VOV4.Jarai-Yă Rčom H’Yĕo ( Rơchâo H’Déo), Khua hơđăp Jơnum min djop djuai ania mơnuih mơnam Việt Nam tơring čar Gia Lai hok mơak biă mă arăng ruah jao bruă kơ ñu ĕp 9 phun tơnia mơ̆ng kual Dap Kơdư ba nao pơ plơi prong jưh jom Hà Nội pioh pla amăng đang pơsat Khua mir sir Hồ Chí Minh.

Hrơi ngă lơphet pla phun kyâo tơnia ƀơi đang pơsat Wa jing sa tơlơi lăp hơdor pioh prong prin amăng tơlơi hơdip mơnuih ƀôn sang djop djuai ania tơring čar Gia Lai. Khua mua apăn bruă hơmâo 50 čô mơnuih, yua kơ yă Rčom H’Yĕo ba jơlan hlâo hơmâo ƀing tha plơi, khua ƀôn, ƀing khua pơtô djop tơlơi đăo mơnuih arăng đăo kơnang, pơ ala kơ djop djuai ania dŏ ƀơi tơring čar Gia Lai. Amăng mông h’ŭ pran jua ol kơdol, yă Rčom H’Yĕo pơ ala kơ mơnuih ƀôn sang djop djuai ania ƀơi Gia Lai lăi pơthâo pran jua hơdor bơni dơlăm prong prin kơ pran jua bruă mă mơ̆ng Ping gah, Wa Hồ.

Rơbêh 10 thun rơgao, hơdôm phun kyâo tơnia tañ prong, đĭ hiam, čah than blang hla bra tơ-ui amăng đang pơsat Wa, jing sa gru pơpŭ pran jua kơjăp khin hơtai tong ten mơ̆ng mơnuih ƀôn sang kual Dap Kơdư kiăo tui Wa, tui kiăo Ping gah. Hrơi anai, ƀrô djơ̆ lơ 2/9, hơdor glăi 76 thun hrơi akŏ pơdong kơnuk kơna lŏn ia, yă Rčom H'Yĕo ră ruai:

“Lơ 2/9/1945, Wa Hồ pơđok hră rơngai lŏn ia Việt Nam. Mơ̆ng anun truh ră anai rơgao 76 thun laih. Yua hơmâo tơlơi rơngai anun ană Jrai, Bahnar ta mơ̆ng hơmâo tơlơi hơdip mơda mơak. Tơdơi kơ thun 1945, truh thun 1946 jơnum Đại hội djop djuai ania, pơtum abih bang djuai ania amăng dêh čar Việt Nam, gum tơngan pran jua blah Prang kiăng rơngai lŏn ia.

Ƀơi Gia Lai hơmâo Jrai, Bahnar, kah hăng Wa Hồ lăi: “Yua ƀudah Thổ, Mường, Mán, Jrai, Bahnar, Êđê, Sedang hai lêng kơ ayong sa kian pruăi, khom gum pơgôp, djru pran jua blah ayăt rơngai lŏn ia pơgang dêh čar hrom. Yua kơ anun, kơnuk kơna hrom hơbit đôč amăng abih bang lŏn ia, adơi ayong hrom soh, ƀu hơmâo lui hlơi pơ klôn ôh, ƀing tha, mơnuih rơwen, mơnuih ƀun, tơnap tap kơnuk kơna djru ba soh laih anun abih bang djru hrom man pơdong lŏn ia”.

Nay Jek: Pơblang