VOV4.Jarai - Ƀơi mông jơnum lok 1, Khua pơ ala mơnuih ƀon sang dêh čar tal 15, Khua Jơnum min wai lăng djŏp djuai ania mơnuih mơnam Việt Nam Đỗ Văn Chiến hơmâo lăi pơthâo hră tum pơƀut hơdôm tơlơi pơgôp hiăp, rơkâo đĭ mơng ƀing kư tri hăng mơnuih ƀon sang. Rơngiao kơ hơdôm tơlơi hơmâo ngă, kư tri hăng mơnuih ƀon sang dŏ bơngơ̆t mơn, biă ñu lĕ klin Covid-19.

Mơnuih ƀon sang tŭ ư hăng tơlơi pơtrun tơpă sit mơng Ping gah lĕ pơtrut đĭ pran kơtang gum pơgôp abih bang djuai ania, ngă mơdưh pran jua kiăng khăp pơjing lŏn ia ta pơđĭ kyar pơdrong asah, yâo mơ-ak. Hrŏm hăng tơlơi dưi ngă amăng bruă pơhlôm, pơgang klin, hơdôm anom bơwih ƀong, sĭ mơdrô hăng mơnuih ƀon sang pơtrut pơđĭ kyar bơwih ƀong huă, sĭ mơdrô; bơwih ƀong đĭ kyar 5,64% hơmâo wơ̆t 3 grup dưm dăp mrô đĭ kyar jar kmar pơđĭ brơi tơlơi đăo gơnang dêh čar mơng “hơđong” đĭ jing “klă hiam”; rơnuk rơnua kơđi čar, hơđong kơjăp mơnuih mơnam hơmâo ngă kơjăp; bruă djru ba tơlơi hơdip mơnuih ƀon sang hơmâo hơđong mơn. Khua jơnum min djŏp djuai ania mơnuih mơnam Việt Nam ơi Đỗ Văn Chiến lăi rơđah: mơnuih bon sang hom mơ-ak lơ̆m Khua dêh čar pơ ala kơ Ping gah, Kơnuk kơna pơtrun bruă tlâ̆o vaccine pơgang Covid-19 ƀơi abih bang prong hloh mơng hlâo truh ră anai, samơ̆ mơnuih ƀon sang ăt dŏ bơngơ̆t mơn:

“Kư tri hăng mơnuih ƀon sang dŏ bơngơ̆t amăng hrơi mông kơƀah vaccine tui anai, tơlơi ƀuăn mơng ƀing brơi vaccine hai ƀu hơđong lơi, vaccine amăng dêh čar ta glăk mă yua lăng đôč, ƀing ta khŏm hơmâo hơdră pơsir klă hloh kah mơng dưi hơmâo mrô mơnuih tlâ̆o vaccine 75% mrô mơnuih amăng dêh čar tui hăng tơlơi pơkă mơng Ding jum ia jrao. Tơdah ƀu dưi ngă bruă tlâ̆o vaccine lĕ bruă rŭ glăi tơlơi bơwih ƀong - mơnuih mơnam amra kaih mơn, tơlơi hơdip mơnuih ƀon sang ăt tơnap mơn, biă ñu ƀing sang anŏ tơnap, ƀu hơmâo pô čem rông, mơnuih rơngiă bruă, kơƀah bruă mă yua pơčlah mơnuih mơnam pơgang klin Covid-19”.

Ơi Đỗ Văn Chiến, Khua Jơnum min djŏp djuai ania mơnuih mơnam Việt Nam lăi pơthâo glăi tơlơi pơgôp hiăp, rơkâo đĭ mơng mơnuih ƀon sang ƀơi mông jơnum lok 1, Khua pơ ala mơnuih ƀon sang dêh čar tal 15.

Anung prăk djru 62 klai prăk tui Tơlơi pơtrun mrô 42 mơng Kơnuk kơna kơ hơdră djru mơnuih ƀon sang tơnap yua klin ngă kiăo tui hrơi blan, pơsir bruă kiăo tui tơlơi truh lơ̆m anun mơn. Khă hnun, mơnuih ƀon sang lăi, bruă ngă anai dŏ sư̆ rơbư̆, pơsit mơnuih dưi ƀong prăk djru aka ƀu djơ̆ hăng tơlơi kiăng ră anai, yua anun bruă brơi prăk mă mơng prăk kơnuk kơna ta djru mơnuih ƀon sang, anom bơwih ƀong hơmâo aset đôč, ƀu djơ̆ tui mrô kiăng hlâo kơ anun ôh. Rơkâo hơdôm ding jum, anom bruă, gong gai djŏp gưl, anom bruă bơdjơ̆ nao kiăng pơtŏng glăi, kơđiăng lui tơlơi aka ƀu djơ̆, črâo rơđah yua hơget hơmâo tơlơi anun, gơgrong bruă kiăng ngă klă hloh mrô prăk djru tui tơlơi pơtrun mrô 68 mơng Kơnuk kơna pioh djru kơ anom bơwih ƀong hăng mơnuih ƀon sang klă hloh.      

Mơnuih ƀon sang dŏ bơngơ̆t mơn, dŏ kơnong 5 blan đôč yơh mơng abih thun 2021 mơ̆ tơlơi aka ƀu dưi pơsir, hơdră ngă bruă, hơdră djru, tơlơi pơkôl pơkă mơng tơlơi phiăn hơmâo mơng sui laih, samơ̆ aka ƀu pơsir ƀơ̆i, tơdah Kơnuk kơna, Ƀirô khua pơ ala mơnuih ƀon sang ƀu pơsir brơi tañ hơdôm tơlơi anai lĕ tơlơi dưi pơđĭ kyar bơwih ƀong huă - mơnuih mơnam amăng thun 2021 amra tơnap biă mă. Amăng hrơi mông ƀing ta glăk pơčlah mơnuih mơnam, kŏm đuăi hyu pơhlôm pơgang klin, hơmâo ƀing čơđai ƀu dưi nao hrăm hră, ƀu thâo hyu ngui ôh amăng lu blan amra bơbeč nao tơlơi pơmin, pran jua mơn, biă ñu lĕ pơ plơi prong, ƀut sang glông dŏ hrŏm. Bruă anai kiăng anom apăn bruă kơsem min tañ ƀiă đah mơng hơmâo hơdră pơsir djơ̆, ƀu dưi ngă pơ mơda ôh kơ tơlơi anai.

Mơnuih ƀon sang kiăng ƀing khua pơ ala mơnuih ƀon sang dêh čar gơgrong bruă hloh dong, gir ngă bruă tơpă sit, tŭ yua hơdră ngă bruă hơmâo pơtrun hăng tơlơi ƀuăn ƀơi anăp mơnuih ƀon sang amăng hrơi ruah khua; gir hrăm, kơsem lăng tơlơi rơgơi, tơlơi apăn bruă mơng ƀing khua; ngă gru,khin hơtai, dŏ hrŏm hăng mơnuih ƀong kah hăng drah kơtăk hrŏm mơtăm yơh; gir ngă bruă tui tơlơi pơtrun: abih pran jua kiăng ană plơi ƀu-eng, gơgrong bruă kiăng ană plơi thâo pap, ngă bruă djơ̆ tơlơi phiăn kiăng ană plơi pơpŭ, hơdeč hmar hur har kơ bruă kiăng ană plơi gơnang. Khua Jơnum min djŏp djuai ania mơnuih mơnam Việt Nam ơi Đỗ Văn Chiến kiăng Khua mua pơ ala mơnuih ƀon sang dêh čar pơplih phrâo bruă mă, pơđĭ tui anŏ klă amăng bruă čih pơkra tơlơi phiăn, tơlơi pơtrun yôm kơ hơdôm tơlơi yôm mơng lŏn ia hăng krăp lăng kơjăp:

“Bruă akŏ pơjing hơdră tơlơi phiăn kiăng lăng yôm tơlơi hơmâo sit, hơmâo hơdră ngă bruă sui thun, ngă plai ƀiă bruă phrâo pơtrun tơlơi phiăn mơ̆ pơkra glăi phrâo baih yua dah tơdah ƀu pơkra ming, pơhrua nao lĕ hơdră ngă bruă anun ƀu djơ̆ hrŏm hăng tơlơi hơdip ôh; tañ pơkra ming, pơhrua tui Tơlơi phiăn lŏn tơnah; rơkâo Khua pơ ala mơnuih ƀon sang dêh čar hrŏm hăng Kơnuk kơna pơsir hĭ tơlơi aka ƀu rơđah kơ tơlơi phiăn hăng hơdôm tơlơi pơsir lăp djơ̆ kah hăng pơtrun sa tơlơi phiăn pơkra lu tơlơi phiăn ƀudah hơmâo tơlơi črâo trun ngă lăng hlâo hăng hơdôm bruă aka ƀu pơsit, gum pơsir brơi tơlơi tơnap tap yua klin Covid-19 ngă hăng tơlơi bơwih ƀong hăng mơnuih ƀon sang. yua dah amăng hrơi huăi hơmâo tơlơi truh hơget lĕ ăt mă yua tơlơi pơtrun tui hơđăp mơn lĕ amra ƀu djơ̆ hăng tơlơi kiăng lơ̆m anun mơn”.

Ƀrô tal anai, Grup khua Jơnum djŏp djuai ania mơnuih mơnam Việt Nam jak iâu abih bang mơnuih, hơdôm anom bruă, wơ̆t hăng mơnuih dêh čar tač rơngiao glăk dŏ pơ dêh čar ta ăt khŏm hơđong pran jua tui tơlơi git gai lăp djơ̆ mơng Ping gah, Kơnuk kơna, Khua dêh čar kơ bruă pơgang klin Covid-19, pơtrut đĭ gru grua thâo gum pơgôp nao rai, tŭ ư hăng djŏp tơlơi jak iâu, ngă tui tơlơi pơtrun dŏ pơčlah mơnuih mơnam, tlâ̆o vaccine pơgang klin Covid-19, ngă tŭ yua tơlơi pơtrun 5K mơng Ding jum ia jrao. Mơnuih ƀon sang abih bang gum hrŏm ha pran jua amra ,dưi pơgăn, pơgang klin Covid-19, ngă truh kih Tơlơi pơtrun Jơnum ping gah dêh čar tal 13, pơsit brơi pran jua kơtưn akŏ pơjing lŏn ia pơđĭ kyar pơdrong asah, yâo mơ-ak./.

Siu H’Mai: Pơblang