VOV4.Jarai-Ƀơi Phú Yên anih sô̆ hăng guai tơring čar Gia Lai hăng Dak Lak hơmâo hơbô̆ bruă pla kyâo glai tŭ yua biă mă, dưi djru kiăng ngă tui ƀơi lu tơring čar pơkŏn amăng kual Dap Kơdư. Hơbô̆ bruă yua anom bruă pơsur ngă hmua dêh čar ngă hrom hăng lu anom bruă djơ̆ hrom laih anun tơring čar Phú Yên pok pơhai amăng 2 thun rơgao.

Hơdră ngă anai, hơmâo pơblih tui ƀơƀrư̆ tơlơi pơmin, thâo hluh mơ̆ng mơnuih ƀôn sang, laih dơ̆ng djru tơring čar Phú Yên pok prong đơ đam pla kyâo glai pơprong ră anai hăng kơñ pơgi.

Amăng dua thun 2020-2021, Anom bruă pơsur ngă hmua tơring čar Phú Yên ngă hrom hăng Anom kơsem min Bơwih ƀong huă wai lăng glai kyâo ngă tui hơdră anăn : “Akŏ pơjing hơdră pla kyâo pơprong amăng glai hăng pơjeh kyâo mi dưi tŭ yap” ƀơi să tơnap tap hloh kah hăng Xuân Quang 2, tơring glông Đồng Xuân, hơdôm să Cà Lúi, Sơn Hội hăng Sơn Phước, tơring glông Sơn Hoà, abih bang 90 ha.

Pơjeh kyâo pla amăng glai lĕ djuai pơjeh kyâo keo, kyâo mi pơdjuai mơ̆ng pơjeh AH1, BV75. Pơkă hăng bruă pla kyâo tui hơdră hơđăp, tŭ yua biă mă bơwih ƀong huă anai, dưi pơtong glăi tŭ yua bơkơnar ƀudah lu hloh. Yua pơhrŏ pơjeh pla, pơhrŏ rơnoh prăk apah mă bruă, blơi kmơ̆k pruai, wai lăng….

Grup nao mă bruă mơ̆ng Anom pơsur ngă hmua dêh čar ĕp lăng hơbô̆ bruă

 pla kyâo pơprong hăng pơjeh kyâo mi

Lu mơnuih ƀôn sang ƀơi tơring čar Phú Yên ngă hrom kơčăo bruă anai, pla kyâo along amăng glai klô, blung a ngă bruă lu mơnuih dŏ bơngơ̆t. Yua kơ tui hăng mơnuih ƀôn sang lĕ, thun blan truh hrơi koh drôm uă kyâo pơprong sui biă mă hăng amuñ hơmâo tơlơi truh sat. Aka yap ôh rơnuč thun juăt hơmâo hơjan hlim, kơthel ngă, kyâo mi joh bơrơbuh anun arăng hŭi rơngiă soh sel.

Ơi Trần Tâm, dŏ pơ plơi Phú Sơn, să Xuân Quang 2, tơring glông Đồng Xuân brơi thâo, ñu ngă hrom bruă pla kyâo glai phun pơprong truh kơ 2,7 ha. Phun kyâo ñu pla hơmâo sa thun đĭ hiam, tŭ añ adai pơ-iă hăng dưi gơgrong hăng angin kơtang anun yơh huăi bơngơ̆t dơ̆ng tah:

“Ră anai wai lăng đang kyâo djơ̆ hơdră kyâo pơđĭ kyar hiam. Ƀuh rơđah lŏn hmua sang anŏ gơmơi pla phun kyâo mi kyâo keo đĭ hiam, hơdôm anih pơkŏn kyâo pơprong hloh hăng dlông mơ̆ng 4 truh 5 met kiah sa thun đôč. Ta pla kyâo tŭ yua, tơdơi anai kyâo dlông hloh, prong djơ̆ hnong pơkă dưi yơh koh drôm ba sĭ hơmâo nua ƀiă”.

Ơi Nguyễn Văn Khương, Kơ-iăng Khua Jơnum min mơnuih ƀôn sang să Xuân Quang 2, tơring glông Đồng Xuân brơi thâo, abih amăng să hơmâo 14 boh sang anŏ mơnuih ƀôn sang ngă hrom pla kyâo pơprong hăng đơ đam 30 ha. Kyâo đĭ hiam biă, anun yơh lu mơnuih ƀôn sang thâo hluh rơđah boh tŭ yua pla kyâo pơprong pioh uă sĭ ngă hnăl tơr.

Kiăng pok prong bruă pla kyâo amăng glai mơnuih ƀôn sang wai lăng, hơmâo pô kơnuk kơna jao wai lăng hơđong kjăp, să Xuân Quang 2 mơ-it nao lu mơnuih ngă hrom Anom bruă pơsur ngă hmua pla pơjing, pioh pơphun bruă pla kyâo keo kyâo mi. Ră anai, pơjeh kyâo mi AH1 hơmâo pla ñu đĭ hiam, tañ prong truh 1,5 wơ̆t pơkă hăng kyâo pơjeh hơđăp:

“Mơnuih ƀôn sang dŏ tơnap dơ̆ng lĕ, hrơi mông, kyâo pla hui, koh drôm kyâo sui thun mơ̆ng 8-10 thun sa wơ̆t, samơ̆ kyâo anai pla 5 thun koh drôm yơh. Yua kơ anun, jak iâu mơnuih ƀôn sang ngă tui pla kyâo pơprong anai, ta sĭ mơdrô kyâo hơmâo nua ƀiă. Khua mua gong gai kơnuk kơna tơring glông pơtrut ană plơi pla kyâo hăng pơtong lăng rơnoh sĭ kyâo laih anun boh tŭ yua mơ̆ng ñu pơkă hăng bruă mă pơkŏn”.

Ơi Trần Tâm, să Xuân Quang 2, tơring glông Đồng Xuân ngă hrom kơčăo bruă

pla kyâo glai pơprong

Ơi Nguyễn Hoàng Tiệp, mơnuih apăn bruă Anom kơsem min bruă pla kyâo glai, Khua khul grup ngă tui hơbô̆ bruă pla kyâo pơprong djuai pơjeh kyâo mi brơi thâo, hnong pla kyâo pơprong hui ƀiă, pơkă hăng bruă pla pơjeh kyâo pơkŏn. Tơdah pla kyâo anai đĭ hiam, mơ̆ng 7-8 thun hơmâo koh drôm truh 200 met khô̆i lơ̆m sa ha:

“Hơbô̆ bruă pla anai phun ataih hăng phun 2 met truh 3 met, jing 1660 phun, glông anai hăng glông adih 2 met mơkrah. Hăng lŏn tơnah kual tong krah rai pơ dơnung arăng pla mơ̆ng 3000-4000 phun sa ha. Arăng pơjeh kyâo rơgêh đôč pla 3-4 thun koh sĭ yơh. Yua kơ anun, hơdră pla kyâo anai ñu phara. Tơdah ta pla ker, pla tañ kah hăng anun lŏn tơnah tañ tơba, lŏn ia hroh, pơjeh pla tañ mơ̆n ñu hlăt pơčrăm. Hơdră pla kyâo amăng glai hăng pơjeh kyâo pơprong ñu ngă hiam, pơgang lŏn tơnah glai klô”.

Ƀơi tơring čar Phú Yên, mơnuih mă bruă ngă hmua, pla kyâo jai hrơi hin tui, boh nik ñu amăng hrơi blan pla kyâo, koh kyâo. Bruă pơđĭ kyar pla kyâo pơprong ngă hrŏ ƀiă đơ đam lŏn pla kyâo mi, pơhrŏ ƀiă mrô mơnuih mă bruă nao pla, koh kyâo. Laih dơ̆ng kyâo pơprong kiăng yua amăng dêh čar ta pô ăt lu mơ̆n, huăi pơtrut ta nao koh kyâo amăng glai yua hơmâo laih kyâo ta pla, djru hrom bruă pơgang ayuh hyiăng lŏn glai kyâo pơtâo.

Kơ-iăng nai tha prin-nai prin tha Lê Quốc Thanh, Khua anom bruă pơsur ngă hmua dêh čar brơi thâo, hơdră pla kyâo pơprong hăng pơjeh kyâo mi ƀơi Phú Yên blung a ba glăi boh tŭ yua klă, tơring čar anai hăng mơnuih ƀôn sang ngă hrom hơdră anai pơtrut ngă tui boh thâo ia rơgơi, wai lăng phun kyâo mi:

“Ƀing ta khom pla hui, kiăng kơ phun kyâo tañ prong khom pruai nao hơbâo kmơ̆k jing. Hlâo adih ta pla kyâo amăng glai, pruai kmơ̆k dưm hơbâo ƀu hơmâo ôh ră anai pla pơtrut đĭ hiam. Hrom hăng anun, hơdră wai lăng djơ̆ boh thâo ia rơgơi, kah hăng koh čre than brơi rơhaih rơhong kyâo tañ prong.

 Khă kiah ha thun đôč, samơ̆ ƀuh phun kyâo đĭ hiam bơkơnar, pơđĭ kyar klă biă mă, sit mơ̆n gơmơi pơmin hơdră ngă anai ba glăi boh tŭ yua lu hơdôm thun pơ anăp”.

Ƀuh rơđah hơdră pla kyâo hăng pơjeh kyâo pơprong ƀơi Phú Yên hlăk pơblih tui ba glăi boh tŭ yua lu. Hơbô̆ bruă anai ăt dưi pơlar tui mơ̆n ƀơi kual Dap Kơdư, lơ̆m lŏn glai kyâo pơtâo jai hrơi ƀiă, kiăng pơsir bruă mă, ĕp prăk kăk kơ mơnuih ƀôn sang laih anun pơgang ayuh hyiăng anih dŏ jum dar hiam klă hloh kơ dêh čar plơi pla lŏn mơnai glai klô.

Nay Jek: Pơblang