VOV4.Jarai - Amăng 9 blan rơgao, yap lăng rim blan hơmâo 10 rơbâo anom bơwih ƀong pơdơi sĭ mơdrô, lơ̆m anun mrô anom bơwih ƀong phrâo akŏ pơdong hăng mrô prăk pioh tuh pơ alin blung a ăt hrŏ trun mơn pơhmu hăng thun hlâo. Ƀơi anăp tơlơi tơnap anom bơwih ƀong, Khua dêh čar ta git gai rơđah rơđông lĕ hơdip hrŏm rơnuk rơnua hăng klin Covid-19 či pơđĭ kyar tơlơi bơwih ƀong.

Tui hăng Anom bruă jŭ yap, yua klin Covid-19 ngă, anih pơkra gơnam ba sĭ jing tơ̆i tơhnal mơn, 9 blan rơgao hơmâo rơbêh 90 rơbâo anom bơwih ƀong lui bruă, dong hnưh ƀu anăm tla, đĭ 15,4% pơhmu hăng tơđar thun hlâo (yap rim blan hơmâo rơbêh 10 rơbâo anom bơwih ƀong tơbiă đuăi mơng anih sĭ mơdrô). Ăt amăng 9 blan rơgao mơn, kơnong hơmâo năng ai 85 rơbâo anom bơwih ƀong akŏ pơdong phrâo, jing aset tui 13,6% pơhmu hăng tơđar thun hlâo. Hrŏm hăng anun, prăk lăi pioh tuh pơ plai ăt aset tui mơn hmu hăhg tơđar thun hlâo. Ơi Phạm Đình Thuý - Khua Vụ Thống kê Công nghiệp hăng xây dựng, Anom bruă Jŭ yap, Ding jum Akŏ bruă hăng Tuh pơ plai lăi lĕ:

“Klin Covid-19 hơmâo mơng akŏ thun 2020, truh ră anai giăm 2 thun laih. Anom bơwih ƀong ƀu anăm dŏ grong dong tah. Aka ƀu hơmâo djơ̆ ôh thun mrô anom bơwih ƀong phrâo akŏ pơdong aset hloh kơ anom bơwih ƀong pơdơi pơkra gơnam, pơdơi bơwih ƀong tui anai”.

Ơi Nguyễn Quang Huân - Khua pơ ala mơnuih ƀon sang dêh čar tal 15, Kơ-iăng khua Khul mơnuih bơwih bong sĭ mơdrô mă pô Việt Nam brơi thâo:

“Hrơi blan rơgao hơmâo pơčlah abih bang, kŏm tơbiă hyu ƀơi lu tơring čar, biă ñu lĕ ƀon prong Hồ Chí Minh, Hà Nội, hơdôm boh tơring čar hơmâo klin yua hnun mrô anom bơwih ƀong lui bruă jing tơlơi amuñ thâo hluh mơn, laih anun khŏm glăm ba hnun yơh yua dah ƀrô pơkra gơnam sĭ mơdrô ƀrô pơgang klin lĕ tơlơi tơnap biă mă, yua hnun ƀing ta khŏm ngă bruă ƀơi kiăng hloh ƀơ̆i hlâo. Phôn hĭ mơn, Khua dêh čar ta git gai črâo bruă rơđah rơđông lĕ hơdip hrŏm rơnuk rơnua tom klin Covid-19 či pơđĭ kyar bơwih ƀong huă, kâo pơmin amra pơplih mơn amăng hơdôm blan rơnuč thun”.

Hơmâo pơđing hmư̆ hrŏm hơdră pơsir hiư̆m pă kiăng anom bơwih ƀong glăk dŏ gơgrong ngă bruă dưi pơkra gơnam sĭ mơdrô; hơdră pơsir hiư̆m pă kiăng hơdôm anom bơwih ƀong glăk hơđong pơkra gơnam sĭ mơdrô dưi pơđĭ kyar hloh amăng hrơi blan pơ anăp..., yă Phí Thị Hương Nga, Kơ-iăng khua Vụ Thống kê Công nghiệp hăng xây dựng, Anom Jŭ yap, Ding jum dưm dăp Akŏ bruă hăng Tuh pơ plai rơkâo:

“Mrô anom bơwih ƀong pơdơi bruă 9 blan akŏ thun lêng kơ anom bruă hơmâo mrô prăk bơwih ƀong yŭ 5 klai prăk. Bruă djru anom bruă plai ƀiă prăk tuh pơ plai jing tơlơi kiăng biă, pơhmutu, brơi anom bơwih ƀong pơčrang kman covid-19 mă pô, laih anun hơmâo akŏ bruă pơkra gơnam sĭ mơdrô lăp djơ̆, ăt pơhlôm tui tơlơi pơtrun pơgang klin Covid-19 laih anun hơdôm boh tơring čar kiăng lui hĭ hră pơ-ar ngă tơnap kơ anom bơwih ƀong”.

Tum pơƀut glăi ƀơi mông jơnum Kơnuk kơna tui tơđar blan 9 laih rơgao, Khua dêh čar ơi Phạm Minh Chính lăi pơtŏng kơ hơdôm tơlơi yôm phun, amăng anun lăng ba biă mă bruă bơwih ƀong mơng anom bơwih ƀong. Rơđah biă ñu pok pơhai hơdôm hơdră hơkrŭ glăi bruă mă ƀơi hơdôm sang măi pơkra gơnam, anih sĭ mơdrô prong. Pơsir brơi tơlơi tơnap djru anom bơwih ƀong dưi djă bong hră rơkâo blơi gơnam, djă bong bruă sĭ gơnam, gir pơkra gơnam amăng bơyan arăng kiăng blơi lu, biă ñu lĕ sĭ kơ hơdôm boh dêh čar blơi gơnam lu kah hăng kual Mi Kô̆, Mi, Đông Bắc Á. Pơphun mă yua tơlơi hơmâo, tơlơi gêh gal mơng hơdôm hră kĭ pơkôl sĭ mơdrô hơmâo kĭ. Jŭ yap, him lăng hlâo mrô gơnam pơkra, mrô gơnam kiăng blơi amăng rơnuč thun đah mơng huăi kơƀah gơnam.

VOV 1: Čih - Siu H’Mai: Pơblang