VOV4.Jarai - Tui hăng Anom bruă gah tơlơi đăo tơring čar Dak Nông brơi thâo, amăng tơring čar Dak Nông ră anai hơmâo giăm 160.420 čô mơnuih tui đăo; 70 čô mơnuih kŏm drơi tui  tơlơi đăo; 77 tơring đăo. Hơdôm thun laih rơgao, mơnuih tui đăo khŏp amăng tơring čar Dak Nông hơmâo pơgôp giăm 28 klai 864 klăk prăk hăng hơdôm rơbâo hrơi mă bruă hrŏm hăng gong gai ƀon lan man pơkra jơlan glông amăng plơi pla.

Jơlan glông amăng plơi Bu Bir lêng kơ prăk kak mơnuih ƀon sang pơgôp man pơkra

Ră anai đơ đam tơring čar hơmâo 29/60 boh să tŭ yap jing plơi pla phrâo. Ba truh tơlơi anai lĕ yua kơ hơmâo tơlơi mut hrŏm mơng djop anom bruă kơđi čar hăng mơnuih ƀon sang, amăng anun hơmâo tơlơi pơgôp prong prin mơng ƀing kŏm drơi jăn tui tơlơi đăo, mơnuih tui đăo. Ơi Điểu Khuyên (djuai ania M’nông) khua plơi Bu Bir, să Quảng Tín, tơrring glông Dak R’lấp brơi thâo, plơi ñu glăk gir thun pơ anăp anai jing “plơi pla phrâo tui hơnong pơkă hle”. Hơdôm hrơi anai neh met wa hok mơ-ak čơkă bơyan No-el samơ̆ ăt kơđiăng mơn amăng bruă pơgang klin Covid-19.

“Lăi biă mă ñu, tơdah ƀu hơmâo klin kheng neh met wa ngui mơ-ak biă mă mơng anai truh pơ hrơi ƀong tết, No-el pơphun tui djuai ania M’nông, No-el giong truh hrơi ƀong tết dong. Ră anai, klin kheng dŏ tơnap tap, ngui mơ-ak ƀơi rĭm boh sang anŏ đôč, ƀu khin tum pơƀut lu mơnuih lơi”.

Siu Đoan: Pơblang