VOV4.Jarai - Hră căn cước công dân pơphun dưi pơsit ƀơi Việt Nam mơng thun 2016. Kiăng pơjing gru than djă pioh hră Căn cước công dân hơđong amăng đơ đam dêh čar, ngă gal brơi kơ mơnuih ngă tui hră pơ-ar hăng hơdôm bruă mă yua hră pơ-ar; anăp nao pơdŏng Gong gai điện tử, lơ 3/9/2020, Khua dêh čar ta hmâo pơsit hơdră pơtrun tuh pơplai Rơwang bruă pơkra, pơsit hăng wai lăng hră căn cước công dân, amăng anun jao kơ Ding jum kông ang lĕ ƀirô pô pok pơhai pơjing glông hră căn cước tŭ ư hrom amăng đơ đam dêh čar. Mơnuih dưi pơsit hră căn cước công dân hăng tơlơi dưi mơng công dân lom ngă hră căn cước hmâo pơkă amăng Tơlơi phiăn căn cước công dân thun 2014.

Tui hăng tơlơi phiăn hră Căn cước thun 2014, mơnuih dêh čar Việt Nam mơng djop 14 thun hăng lu hloh dưi pơsit hră Căn Cước công dân (ƀut 1 Mơta tơlơi mrô 19). Hră căn cước công dân khom pơplih glăi lom djop 25 thun, djop 40 thun hăng djop 60 thun (Mơta tơlơi 21). Hơdôm hră căn cước công dân dưi pơplih, pơsit glăi amăng rơwang 2 thun hlâo kơ thun pơkă lĕ ăt dưi mă yua mơn truh kơ pơplih hră tô̆ tui. Rơngiao kơ anun, hlơi hmâo Hră kak hơđăp (CMND 9 mrô hăng 12 mrô), hră Căn cước công dân hmâo glông čih mrô dưi pơplih jing hră Căn cước công dân hmâo dưm čip lom hmâo tơlơi kiăng ƀudah lom hră sô hơđăp abih hrơi pơkă mă yua...

Mrô hră căn cước công dân hmâo 12 mrô. Anai jing mrô pơkă anăn mơnuih mơng rim mơnuih. Mrô anai pơkĕ hrom hăng mơnuih mơng hrơi tơkeng truh kơ hrơi mơnuih anun djai, ƀu hmâo pơplih hăng djơ̆ hrom hăng hlơi pô pơkon. Mrô pơkă anăn păn dưi pơsit mơng Mrô djă pioh gah lŏn ia ta kơ anih anom dô̆, yua pioh tô nao rai, lăi pơthâo mă yua tơlơi pơhing mơng công dân.

Tui Mơta tơlơi mrô 20 Tơlơi phiăn căn cước công dân 2014: Hră Căn cước công dân dưi mă yua pơ ala kơ bruă mă yua hră đuăi hyu tơdah Việt Nam hăng dêh čar tač rơngiao kĭ tơlơi pơkôl ƀudah tơlơi pơkôl jar kơmar brơi mơnuih amăng lŏn ia kĭ pơkôl dưi mă yua hră Căn cước công dân pơ ala kơ bruă mă yua hră đuăi hyu pơ̆ lŏn ia mơng dua bơnah. Hrom hăng anun, hră căn cước công dân hmâo dưm čip điện tử ră anai dô̆ ba truh lu tơlơi gal kơ mơnuih mă yua ñu. Thượng tá Huỳnh Văn Long, Kơ-iăng Khua Kông ang plơi prong Cao Lãnh, tơring čar Đồng Tháp brơi thâo:

“Hră căn cước công dân hmâo dưm čip điện tử kiăng djru kơ bruă wai lăng kơnuk kơna, ngă gal brơi kiăng mơnuih mă yua ngă tui hơdôm mơta hră pơ-ar mơng pô. Căn cước công dân hmâo tơlơi pơsit anăn păn, anih dô̆ amra jing gru than kiăng ngă tui amăng bruă ngă hră pơ-ar mơng mơnuih mă yua pơ ala kơ hră akô̆ sang. Hră căn cước công dân hmâo dưm čip hmâo hơdră hơgom kơjăp, brơi tum pơƀut lu tơhnal mă yua nao hrom, amra dưi mă yua hăng tô nao rai ƀơi lu anih hăng hơdôm mơta hră pơ-ar khul hăng rim mơnuih”.

Tơlơi phiăn hră căn cước công dân ăt pơkă mơn, pô anun lĕ ama, amĭ, rơkơi, ană bă gah yŭ kơ 18 thun mơng ling tơhan pơsăn drơi; ling tơhan rơka ruă, mơnuih dưi čơkă mă hơdră bruă kah hăng ling tơhan rơka ruă; ling tơhan duam ruă; công dân dô̆ ƀơi hơdôm bôh să guai lŏn ia; mơnuih dô̆ ƀơi hơdôm bôh tơring glông bul ia rơsĭ; neh wa djuai ania ƀiă ƀơi hơdôm bôh să bơwih ƀong – mơnuih mơnam tơnap tap; mơnuih gah sang anô̆ ƀun rin tui tơlơi pơkă mơng tơlơi phiăn; dưi ngă brơi đô̆c hră căn cước công dân. Thượng tá Tô Anh Dũng, Kơ-iăng Khua Anom bruă tơhan polih wai lăng hră pơ-ar gah hơđong mơnuih mơnam, Ding jum kông ang brơi thâo:

“Lom hơdôm bruă ngă pơ-ar mă yua kiăng tô nao rai hăng ding jum, gơnong bruă mơng mrô djă pioh gah lŏn ia gah anih anom dô̆ anai mơnuih ƀôn sang nao pơ̆ hơpă ngă hră pơ-ar ƀơi ding jum gơnong bruă hơpă, ƀing ta hmâo yap nao bruă tô nao rai lăi pơthâo hăng hơdôm ding jum gơnong bruă kiăng djru klă kơ tơlơi kiăng yua mơng mơnuih ƀôn sang”.

Mơnuih ngă hră căn cước hmâo tơlơi pơhlôm hơgom drơi pô, hơgom sang anô̆ amăng Mrô djă pioh mơng lŏn ia kơ anih anom dô̆ hăng Mrô hră căn cước công dân, tơdah lăi pơthâo tơlơi pơhing drơi pô, hră pơ-ar tui tơlơi phiăn pơkă. Tơlơi rơkâo ƀirô wai lăng hră căn cước công dân lăi pơthâo, pơplih pơkra tơlơi pơhing lom tơlơi pơhing amăng Mrô djă pioh mơng lŏn ia kơ anih anom dô̆, Mrô djă pioh hră căn cước công dân ƀudah Căn cước công dân akă hmâo, akă djơ̆ ƀudah hmâo tơlơi pơplih tơlơi pơkă amăng tơlơi phiăn; Dưi pơsit, pơplih, ngă glăi hră Căn cước công dân tui tơlơi pơkă amăng tơlơi phiăn anai; Ƀom kiơng, tơgŭ kơđi tui tơlơi pơkă amăng tơlơi phiăn pioh kơ tơlơi ngă soh tơlơi phiăn gah căn cước công dân, Mrô djă pioh mơng lŏn ia kơ anih dô̆ hăng Mrô djă pioh căn cước công dân; Mă yua hră Căn cước công dân mơng pô amăng bruă ngă hră pơ-ar, ngă tui tơlơi dưi, bôh tŭ yua djơ̆ phiăn mơng ană mơnuih.

Ding jum kông ang brơi thâo, tơdơi kơ hơdôm hrơi pok pơhai tañ Rơwang bruă pơjing mrô djă pioh mơng lŏn ia kơ anih dô̆ hăng Rơwang bruă pơkra, pơsit hăng wai lăng căn cước công dân, truh ră anai, abih bang khul hmâo ha amăng plĕ mut amăng glông djă pioh mrô rơbêh kơ 98 klăk čô mơnuih dêh čar Việt Nam. Hrom hăng anun, khul kông ang hmâo tŭ mă giăm truh 40 klăk hră pơ-ar ngă căn cước công dân mơng mơnuih ƀôn sang, hmâo 79,4% hăng amra dưi hmâo djơ̆ hăng tơhnal pơsit 50 klăk hră căn cước công dân hlâo kơ lơ 1/7 pơ̆ anăp./.        

Siu H’ Prăk: Pô pơblang