VOV4.Jarai - Tơdơi kơ Kơnuk kơna hơmâo Tơlơi pơtrun jơnum 128 kơ bruă dŏ hrŏm rơnuk rơnua, pơgang klă klin Covid-19, lu anom bơwih ƀong ƀơi hơdôm boh tơring čar gah Dơnung mă bruă glăi tui hơđăp lĕ mơnuih mă bruă mơng hơdôm boh tơring čar kual Dap Kơdư ăt pơwơ̆t glăi mă bruă mơn. Ƀơi jơlan prang mrô 14, hơdôm hrơi giăm anai hơmâo lu rơdêh pơđuăi pơrơtui kiăo tlôn nao pơ hơdôm tơring čar kual Dơnung, mơnuih mă bruă đuăi glăi ngă bruă čang rơmang tơlơi aka ƀu hơđong, tơlơi dŏ bơngơ̆t mơng anom bơwih ƀong hơmâo pơsir giong laih.

Amăng mông klin kơtang, anom bơwih ƀong krư̆ bah amăng, mơnuih mă bruă mơng kual Dap Kơdư luh glăi pơ plơi pla. Samơ̆ tơdơi kơ Kơnuk kơna ta hơmâo tơlơi pơtrun dŏ hrŏm rơnuk rơnua hăng klin kheng, pơgang klă klin Covid-19, lu anom bơwih ƀong mă bruă glăi jing mơnuih mă bruă mơng hơdôm boh tơring čar kual Dap Kơdư ăt pơwơ̆t glăi mă bruă mơn. Sit ñu, rim hrơi hơmâo giăm 1.000 čô mơnuih nao pơ hơdôm boh tơring čar kual Dơnung. Anai lĕ tơlơi mơ-ak ƀiă yơh kiăng hơkrŭ glăi tơlơi bơwih ƀong pơ kual bơwih ƀong phun gah kual Dơnung tơdơi kơ hơmâo klin. 

Siu H’Mai: Pơblang