VOV4.Jarai - Tơdơi kơ Kơnuk kơna hơmâo tơlơi pơsit mrô 128 kơ bruă hluai tui tơlơi sit nik, hơdeč hmar, pơgang kjăp hloh klin Covid-19, lu anom bơwih ƀong sĭ mơdrô ƀơi hơdôm tơring čar kual Dơnung pơwŏt glăi mă bruă, yua anun mơnuih mă bruă mơng hơdôm tơring čar kual Dap kơdư ăt pơphun pơwŏt glăi mă bruă. Kơtuai tui jơlan mrô 14, hơdôm hrơi giăm anai ƀuh lu mơnuih đĭ rơdêh thut pơwŏt glăi hơdôm tơring čar kual Dơnung, mơnuih pơwŏt glăi mă bruă hăng hơdôm tơlơi čang rơmang lơ̆m anun sa, dua čô ăt dŏ bơngŏt mơn samơ̆ hơmâo anom bơwih ƀong sĭ mơdrô ƀuăn pơsir hĭ abih.

Tơdơi kơ rơbêh 1 blan glăi pơ plơi pla pioh pơgang klin ƀơi tơring glông Čư̆ Pưh (Gialai) ayong Nguyễn Minh Khánh hăng ƀing gơyut gơyâo giăm 20 čô pơwŏt glăi tơring čar Bình Dương mă bruă. Amăng hrơi blan pơgang klin, ayong Khánh hơmâo tlâ̆o 1 ară vaccine pơgang klin Covid-19 laih hăng hlâo kơ đĭ rơdêh pơwŏt glăi mă bruă ñu hơmâo pơčrang lăng huăi ƀiă klin Covid-19 ôh, yua anun amuñ găn nao hơdôm anih wai pơgang klin ƀơi dua tơring čar Daklak, Dak Nông. Ayong Khánh mă bruă ƀơi kông ti pơdŭ pơgiăng hyu gơnam, prăk apah sa blan tui hlâo anun 6 klăk 500 rơbâo prăk. Lơ̆m pơwŏt glăi mă bruă, kông ti ƀuăn đĭ tui prăk apah lĕ 8 klăk 500 rơbâo prăk, yua anun ñu pơwŏt glăi mă bruă hăng ăt plai ƀiă mơng hŭi ƀă klin lơ̆m kông ti pơsit tong amra brơi mă bruă 3 mơta ha anih, pơhlôm rơnuk rơnua brơi mơnuih mă bruă.

“Bruă kâo lĕ pơdŭ glăm hyu gơnam, ƀañ kẹo, ia mơmih. Lơ̆m pơwŏt glăi bruă mă 3 mơta ha anih, prăk apah 8 klăk 500 rơbâo. Hăng ƀing gơmơi mă bruă ha anih yua anun huăi hŭi ƀă klin ôh, dŏ kơnong amăng sang, ƀu tơbiă hyu, ƀu bưp hlơi hlơi ôh”.

Mơnuih mă bruă pơwŏt glăi mă bruă hăng lu tơlơi čang rơmang

Ăt glăk đĭ rơdêh hrŏm hăng giăm 30 čô mơnuih, hơmâo gơyut gơyâo, adơi ayong pơwŏt glăi tơring čar Đồng Nai mă bruă, ayong Y Trinh Ƀuôn Yă, dŏ ƀơi plơi prong Ƀuôn Hồ, tơring čar Daklak brơi thâo, 3 blan glăi pioh pơgang klin tơlơi hơdip tơnap tap yua ƀu hơmâo bruă mă. Bưng băi hơmâo kông ti pơkra khŏ jĕp anih ayong Y Tring mă bruă hơmâo djru brơi mơnuih mă bruă 1 klăk 500 rơbâo amăng sa blan lơ̆m kông ti pơdơi mă bruă. Anai lĕ tơlơi pơtrut pơsur kiăng kơ ƀing kông nhơn kar hăng ñu pơwŏt glăi mă bruă tơdơi kơ Kơnuk kơna hơmâo tơlơi pơsit mrô 128 kiăng hluai tui tơlơi sit nik, hơdeč hmar, pơgang klin Covid-19 kjăp hloh, anom bơwih ƀong sĭ mơdrô pok glăi mă bruă. Tơlơi ngă kơ ayong Y Trinh bơngŏt lĕ ñu aka ƀu tlâ̆o vaccine, samơ̆ anom bơwih ƀong sĭ mơdrô ƀuăn amra tañ tlâ̆o brơi vaccine kơ abih bang kông nhơ:

“Kâo lĕ ngă kông nhơn pơkra khŏ jĕp, pơdŭ gơnam. Kông ti iâu pơwŏt glăi mă bruă khŏm tlâ̆o vaccine kah mơng dưi mă bruă. Kông ti ăt djru brơi hăng ƀuăn ngă tui tơlơi pơkôl”.

Lơ̆m klin ngă tơnap tap, anom bơwih ƀong sĭ mơdrô krư̆ bah amăng, mơnuih mă bruă ƀơi kual Dap kơdư tơbiă mơng hơdôm tơring čar kual Dơnung pioh pơgang klin. Samơ̆ tơdơi kơ Kơnuk kơna hơmâo tơlơi pơsit hluai tui tơlơi sit nik, hơdeč hmar, pơgang klin Covid-19 kjăp hloh, lu anom bơwih ƀong sĭ mơdrô pok glăi mă bruă laih anun mơnuih mă bruă mơng hơdôm tơring čar kual Dap kơdư ăt pơwŏt glăi mă bruă. Sit biă ñu, rĭm hrơi hơmâo giăm 1.000 čô mơnuih pơwŏt glăi hơdôm tơring čar kual Dơnung. Anai ăt lĕ tơlơi ngă hok mơ-ak kiăng hơkrŭ glăi tơlơi bơwih ƀong huă ƀơi kual Dơnung tơdơi kơ pơgang hĭ klin.

Siu Đoan: Pơblang