VOV4.Jarai-Kah pơpha tơlơi tơnap tap hăng mơnuih ƀôn sang arăng guang dar hĭ laih anun ƀing tơhan hlăk mă bruă djru mơnuih ƀôn sang kual hơmâo klin ƀơi ƀôn prong HCM hăng hơdôm tơring čar kah hăng Bình Dương, Đồng Nai, hơdôm hrơi hăng anai, djop plơi pla tơring tơrang ƀơi Dak Nông, lu khul grup mơnuih ƀôn sang ngă hrom pơyơr pran jua yua kơ ană plơi pla, mơnuih hơmâo pran jua čơmah laih anun mơnuih ƀôn sang djop djuai ania, hơmâo djru boh troh, mơnong ƀong huă, añăm pơtam hơdôm rơtuh tơn kiăng pơgiăng ba nao pơ anih klin kheng kơtang, gum tơngan hrom pơtrut đuăi klin kheng Covid 19.

Mơnuih ƀôn sang hyu pơhrui añăm pơgiăng pơ ƀôn prong Hồ Chí Minh hlăk guang dar yua klin Covid 19 ngă

Yap mơ̆ng lơ 23/6 truh lơ 12/7, Khua mua sang phơt tơring čar Dak Nông pơčruh hơmâo 142 tơn gơnam kah hăng braih, añăm pơtam, hơbơi čên, pơtơi, boh mit, boh ƀơr, plôi, hơdă djru kơ mơnuih ƀôn sang pơ kual klin kheng ngă.

Ƀơi tơring glông Dak Glong rơbêh 70 tơn hơbơi pơtơi, añăm pơtam hơmâo pơƀut laih sa anih prăp či ba nao. Tơring glông Dak Song hăng Tuy Đức djru rơbêh 60 tơn añăm pơtam boh troh hăng 6000 asar boh mơnŭ bip pioh djru kơ mơnuih ƀôn sang kual klin ngă kơtang.

Nay Jek: Pơblang