VOV4.Jarai - Ngă tui jơlan hơdră bưp mơnuih ƀôn lan tơdơi kơ tal jơnum lok dua, Khua pơ ala mơnuih ƀôn sang dêh čar ta tal 15, phrâo rơgao. Khua Grŭp mă bruă Ping gah dêh čar ta Phan Đình Trạc hrom hăng Grŭp pơ ala Khua pơ ala mơnuih ƀôn sang tơring čar Lâm Đồng hmâo pơphun bưp mơnuih ƀôn lan ƀơi lu plơi pla. Mơng anun, mơnuih pơ ala mơnuih ƀôn lan leng kơ pơdah pran jua mơ-ak kơ tơlơi truh kih mơng tal jơnum Khua pơ ala mơnuih ƀôn sang phrâo rơgao hăng tơlơi pơplih phrâo, pơčeh phrâo, hrom hăng anun rơkâo lu tơlơi ƀơi plơi pla.

Tơdơi kơ pơđut Tal jơnum lok 2 Khua pơ ala mơnuih ƀôn sang tal 15 mơtăm, Khua Grŭp mă bruă Ping gah dêh čar ta ơi Phan Đình Trạc hrom hăng Grŭp pơ ala Khua pơ ala mơnuih ƀôn sang tơring čar Lâm Đồng hmâo bưp mơnuih pơ ala mơnuih ƀôn lan sa dua phường, să gah tơring glông Đức Trọng, Lạc Dương hăng plơi prong Đà Lạt, tơring čar Lâm Đồng.

Ƀơi hơdôm anih anom bưp, mơnuih pơ ala mơnuih ƀôn lan Lâm Đồng leng kơ pơdah pran jua đăo gơnang hăng čang rơmang hơdôm hơdră pơsit amăng pơtrut pơđĭ kyar bơwih ƀong – mơnuih mơnam, jơlan gah yak rơgao tơlơi tơnap yua kơ klin Covid-19 mơng Kơnuk kơna, mơng Khua pơ ala mơnuih ƀôn sang rơgao tal jơnum lok 2 Khua pơ ala mơnuih ƀôn sang tal 15. Hrom hăng anun, rơkâo dong lu tơlơi bơdjơ̆ nao bruă wai lăng kơnuk kơna amăng hơdôm bruă, hơdôm hơdră bruă hơđong tơlơi hơdip mơnuih mơnam hăng kơčăo bruă pơtrut bơwih ƀong huă, sĭ mơdrô amăng tơlơi hơđong phrâo.

Ƀơi să Hiệp An, tơring glông Đức Trọng, lu tơlơi gum pơhiăp mơng mơnuih pơ ala mơnuih ƀôn lan lăi nao kơ lŏn drŏn, biă ñu bruă pơsit hră mă yua lŏn kaih; pơkă guai lŏn ngă đang hmua akă ƀu rơđah rơđông; bruă trun sang pha, pơkra jơlan nao rai amăng plơi pla, pơ ala glăi anih anom mă yua pơkra dơnao ia Ta Hoét bưp lu tơlơi akă gal... Tui hăng mơnuih pơ ala mơnuih ƀôn lan Mai Khả Cử, ƀơi plơi Tân An, să Hiệp An, hrom hăng hơdôm tơlơi kiăng anai, bruă wai lăng hơđong pơdŏng pơkra ăt glăk jing tơlơi hang tơngia kiăng hmâo Khua pơ ala mơnuih ƀôn sang, gong gai hơdôm gưl lăng ba, pơplih pơkra.

“Să Hiệp An dŏng amăng anih dưi pơkă pơdŏng plơi prong samơ̆ bruă pơdŏng pơkra pơphun ƀu hmâo akô̆ tlôn ôh. Rôk tui jơlan 20 pơdŏng pơkra tui hơdră hơpă mơ̆ sang dô̆, anih anom sĭ mơdrô hiưm hơpă mơ̆ tơhlul tơbiă hmâo, čut mut hmâo. Sang pơdŏng hlâo ƀu hmâo ngă hră pơ-ar ôh, sang pơkra tơdơi lĕ ngă hră pơ-ar rơkâo bơtơhmal... Rơkâo gưl dlông khom pel ĕp, lăng glăi bruă wai lăng tơlơi hơđong bruă man pơdŏng”.

Anih jơnum bưp mơnuih ƀôn sang să Lát, tơring glông Lạc Dương, tơring čar Lâm Đồng

Tui hăng anun, mơnuih ƀôn sang să Lát, tơring glông Lạc Dương lĕ rơkâo sa dua bôh yôm bơdjơ̆ nao hơdôm tơlơi pơplih lŏn ngă đang hmua, đang kyâu jing lŏn dô̆; bruă pơsit hră mă yua lŏn, bruă pơdŏng plơi pla hơđong, ngă đang hmua hơđong bơdjơ̆ nao rơwang bruă drai ia pơkĕ apui lơtrik Dă Dâng – Dă Chomo; djru brơi čan prăk pơalin hrom kiăng bơwih ƀong huă, hrưn đĭ tơtlaih mơng ƀun rin; tơlơi djru pioh kơ sa dua anăn păn gưl să. Mơnuih ƀôn sang ăt rơkâo mơn khom pơtrut tañ rơnoh pơkă jơlan ĐT 726 kiăng mă yua gêh gal, pơđĭ kyar bơwih ƀong; kơtưn pơsir tơlơi rơdêh pơgiăng rơgao hnong pơkă, pơđĭ tui mrô sang anô̆ mă yua ia hơdjă...

Lom anun, mơnuih ƀôn sang plơi prong Đà Lạt biă ñu đing nao bruă pơgang, pơgăn Covid-19 hăng hơdôm jơlan gah hơkrŭ glăi bruă bơwih ƀong huă, sĭ mơdrô gah tuai čuă ngui, pơtrut bơwih ƀong – mơnuih mơnam pơđĭ kyar. Mơnuih ƀôn sang Nguyễn Thị Hiếu Hòa, Khua Anom ia jrao Đà Lạt lăi lĕ, hăng tơlơi gơnam tam mă yua hăng mơnuih mă bruă ƀiă, bruă mă na nao rơgao hơnong kah hăng ră anai, tơdah ƀu hmâo tơlơi pơtlaih hmao tlôn lĕ Đà Lạt tơnap ngă tui ba glăi bôh tơhnal pơkă dua mơta ngă sa wot amăng tơlơi hơđong phrâo.

“Anom ngă tui bruă jao na nao kah hăng pel ĕp, pơjrao tơlơi duam ruă, pơhlôm hlâo, bruă mă mrô mơnuih, hrom hrom hăng bruă pơgang, pơgăn klin. Mơnuih mă bruă kiăng dưi ngă bruă lĕ kơƀah, lom anun ăt glăk ngă tui mơn tơlơi hrŏ trun mơnuih mă bruă čar. Pơ̆ anăp anai, lom pok pơhai ngă tui dong hơdôm bruă mă kơ kual pơjrao tơlơi ruă ăt kah hăng bruă pơhlôm hlâo, pơgang, pơgăn klin kheng, hơdôm bruă mă gah ia jrao rô hyu hăng hơdôm khul grŭp bơwih bruă... sit ñu amra đĭ tui pran mă bruă hăng rơgao hơnong hăng sang ia jrao să, plơi pla”.

Ơi Phan Đình Trạc đĭ gum pơhiăp amăng mông bưp

Pơ ala kơ Grŭp pơ ala Khua pơ ala mơnuih ƀôn sang tơring čar Lâm Đồng, Khua Grŭp mă bruă Ping gah dêh čar, ơi Phan Đình Trạc čih djă pioh, pơsit yôm hơdôm tơlơi rơkâo đĭ djơ̆ sit hăng tơlơi hơdip mơda rim  hrơi mơng mơnuih ƀôn sang. Hrom hăng anun, pơblang, ngă rơđah dong sa dua tơlơi bơdjơ̆ nao hơdră bruă djru tơdơi kơ tơtlaih mơng ƀun rin, kiăng pơhlôm bôh than tơtlaih mơng ƀun rin kơjăp; hơdră gum djru pioh kơ mơnuih apăn bruă gưl să, biă ñu mơnuih gơgrong bruă, plơi pla. Biă ñu đing nao tơlơi gum pơhiăp mơnuih ƀôn sang să Lát, tơring glông Lạc Dương kơ tơlơi lŏn drŏn, ơi Phan Đình Trạc rơkâo gong gai hăng gơnong bruă plơi pla khom lăng ba, pơsir hmao tlôn.

“Anai lĕ sa bôh să kual čư̆ siăng hmâo tơtlaih mơng ƀun rin hăng djơ̆ tui să plơi pla phrâo. Čang rơmang neh wa ƀing ta gir run dong, hrưn đĭ, gum hrom hơbit, hơkrŭ pơsir tơlơi tơnap, pơsit pran jua kơtang hloh dong, prong hloh dong kiăng ƀing ta ƀu djơ̆ kơnong kơ djă kơjăp să plơi pla phrâo ôh mơ̆, dô̆ hmâo să plơi pla phrâo ngă gru dong. Jum dar tơlơi lŏn dô̆, lŏn ngă đang hmua, pơsit hră mă yua lŏn, pơ ala glăi lŏn pơdŏng plơi hơđong... lĕ rơkâo tơring glông, să, tơring čar tañ djru brơi neh wa. Yua anun lĕ tơlơi kiăng biă mơng bruă bơwih ƀong huă, hơđong tơlơi hơdip mơda”.

Ƀrô djơ̆ tal bưp mơnuih ƀôn sang tơdơi kơ Tal jơnum lok 2, Khua pơ ala mơnuih ƀôn sang dêh čar tal 15, Khua Grŭp mă bruă Ping gah dêh čar Phan Đình Trạc hmâo ƀơk laih kơ tơring čar Lâm Đồng hơdôm măi mok mă yua gah ia jrao djru bruă pơgang, pơgăn klin Covid-19, anun lĕ: 10 bôh măi suă pran, 200.000 blah bơnal gôm adung mơbah hăng 200.000 ƀe test tañ Covid-19 mơng Ding jum ia jrao. Hrom hăng anun, djru 600 anung gơnam kơ mơnuih mă bruă ƀơi sang măi plah tơsiong hăng mơnuih mă bruă tơnap tap ƀơi tơring čar Lâm Đồng mơng Phun akha khul mut phung dêh čar Việt Nam./. 

VOV Tây Nguyên: Čih – Siu H’ Prăk: Pơblang