VOV4.Jarai - Rơgao kơ lăng tui tơlơi tơña hăng lăi glăi tơlơi tơña, biă ñu lĕ črăn tơlơi lăi glăi mơng Khua dêh čar ta ơi Phạm Minh Chính amăng mơguah 12/11, mơnuih ƀôn sang Trần Mạnh Việt, Khua Khul mơnuih tha rơma ƀơi phường 3, plơi prong Đà Lạt (Lâm Đồng) hmâo pơdah tơlơi hơđong pran jua mơng pô kơ hơdôm jơlan gah hơkrŭ hăng pơđĭ kyar bơwih ƀong – mơnuih mơnam, yak rơgao klin Covid-19 mơ̆ Khua dêh čar ta hăng ƀing ding kơna mơng Kơnuk kơna hmâo jơlan gah pơsir hăng lăi nao. Khă hnun hai, mơnuih ƀôn sang Trần Mạnh Việt čang rơmang hơdôm jơlan gah anai dưi pok pơhai rơđah hloh, ngă hiưm hơpă djơ̆ hăng rim plơi pla.

Kư tri Nguyễn Huỳnh, mơnuih pơdơi thun lơtret laih, dŏ ƀơi ƀut plơi 7, phường Thắng Lợi, plơi prong Kon Tum, tơring čar Kon Tum lăi: Tơlơi hơmâo tơña mơng ƀing khua pơ ala mơnuih ƀon sang lĕ hơdôm tơlơi mơ̆ kư tri glăk pơđing nao mơn. Bơ bruă lăi glăi tơlơi tơña mơng 4 čô khua ding jum: Ia jrao, Mơnuih mă bruă Tơhan rơka hăng Mơnuih mơnam; Pơtô hăng Pơjuăt; Pơphô brơi akŏ bruă hăng tuh pơ plai prăk kăk ăt kah hăng hơdôm tơlơi hơmâo ngă rơđah dong mơng sa, dua Ding jum anom bruă bơdjơ̆ nao lĕ yôm phun, rơđah rơđông hăng kiăng klă. Biă ñu, ƀơi mông tơña hăng lăi glăi tơlơi tơña jơnum tal anai, tơlơi pơgôp hiăp mơng Khua dêh čar hăng ƀing Kơ-iăng khua dêh čar hơmâo ngă rơđah hloh hơdôm tơlơi yôm phun, pơtŏng glăi abih bang, dlăm tui bruă git gai, pơsir pơđĭ kyar bơwih ƀong huă - mơnuih mơnam mơng lŏn ia ta amăng hrơi mông glăk hơmâo klin Covid-19. Kư tri Nguyễn Huỳnh pơdah pran jua, ñu lăng yôm biă mông tơña hăng lăi glăi tơlơi tơña tal anai, hăng tơlơi dưi ngă mơng Kơnuk kơna:

“Tal anai krăp lăng mông tơña hăng lăi glăi tơlơi tơña mơng khua mua pơ ala mơnuih ƀon sang dêh čar hăng ƀing Khua ding jum, lăi nao abih bang kâo lăng ƀing Khua ding jum lêng thâo rơđah djŏp bruă ƀing gơñu kiăng ngă. Biă ñu lĕ ding jum dưi pơplih mă amăng hrơi mông hơmâo klin Covid-19. Klin kheng ngă tơlơi hơdip ƀing ta pơplih phara, abih bang bruă git gai mơng Kơnuk kơna ăt khŏm lăp djơ̆ mơn. Mơng hrơi hơmâo klin truh ră anai, Kơnuk kơna hơmâo lu tơlơi pơplih laih. Kơnuk kơna hơmâo hơdră ngă bruă lăp djơ̆ hăng tơlơi hơmâo phrâo. Kâo lăng Ping gah, Kơnuk kơna ta bơngơ̆t, lăng ba hăng ĕp hơdră djru kiăng amăng mông hơmâo klin anai dưi ngă dua mơta bruă ƀrô pơgang klin rah ƀrô pơđĭ kyar tơlơi bơwih ƀong rah”.

Siu H’ Prăk – Siu H’ Mai: Pơblang