VOV4.Jarai-Rơwang hrơi tơjuh rơgao, grup khua mua pơ ala mơnuih ƀôn sang dêh čar ƀơi hơdôm tơring čar amăng kual Dap Kơdư pơphun hyu bưp mơnuih ƀôn sang ruah khua hlâo kơ nao jơnum lok 2, khua mua pơ ala mơnuih ƀôn sang dêh čar tal XV. Ƀơi hơdôm anih bưp mơnuih ƀôn sang ruah khua pơdah pran jua hok mơak ƀơi mông jơnum lok sa khua mua pơ ala tal XV hlâo kơ anai, tŭ ư hăng lu boh yôm phun, hơdră mă bruă mơ̆ng ƀing pơ ala mơnuih ƀôn sang dêh čar či jơnum lok 2, laih anun rơkâo đĭ lu tơlơi kiăng, pơgôp hiăp djop bruă mă sit nik amăng plơi pla.

Rơđah biă ñu, kiăng tlâ̆o djop ia jrao vaccine hmao kru pơgang Covid 19 kơ mơnuih ƀôn sang, hơmâo jơlan hơdră djru mơnuih ƀôn sang rŭ glăi tơlơi bơwih ƀong huă tơdơi kơ abih klin kheng, pơđing nao tuh pơ alin pơđĭ kyar bruă ngă hmua sa tơlơi gêh găl ƀơi kual Dap Kơdư....

Ƀơi mông bưp mơnuih ƀôn sang ruah khua, Grup khua mua pơ ala mơnuih ƀôn sang dêh čar mơ̆ng tơring čar Dak Lak čih pioh lu tơlơi pơgôp hiăp pơđing nao kơ hơdôm jơlan hơdră ngă tui dua hơdră pơđĭ kyar bơwih ƀong huă rah hăng pơhlôm, pơgang klin rah ba glăi boh tŭ yua, tơlơi anai mơnuih ruah khua hơmâo lăi nao lu.

Grup khua mua pơ ala mơnuih ƀôn sang dêh čar tơring čar Dak Lak bưp mơnuih ruah khua

Laih dơ̆ng, mơnuih ruah khua rơkâo hăng khua pơ ala mơnuih ƀôn sang dêh čar, Kơnuk kơna, djop ding jum, anom bruă pơ gơnong dlông hăng tơring čar ăt git gai kơtang hloh pơhlôm, pơgang klin covid 19, ĕp blơi ia jrao vaccine tlâ̆o pơgang brơi kơ ană plơi pla, kơtưn bruă mă, mơneč mă anŏ gêh găl kơ bruă ia jrao, wơ̆t hăng khul ngă bruă gah ia jrao, gơnam yua gah ia jrao pioh pơjrao duăm ruă, boh nik ñu  ƀing nai ia jrao mă bruă amăng plơi pla kiăng tañ pơtrut đuăi klin, ba lŏn ia ta tañ pơwơ̆t glăi bruă mă kah hăng tơđar amăng hrơi blan phara phrâo. Mơnuih ƀôn sang ruah khua, Lê Văn Thao dŏ pơ să Êa Trang, tơring glông Mdrak rơkâo đĭ:

“Hrơi blan rơgao hăng rơnoh vaccine dưi hơmâo, tơring glông hơmâo pok pơhai tlâ̆o brơi djop mơnuih hơmâo anăn tui tơlơi pơtrun, samơ̆ kiăng tŭ yua hloh dơ̆ng pơ anăp adih, klin kheng plai ƀiă ƀă amăng plơi pla, lăng nao sui tơdơi adih  rơkâo kơ djop gưl anom bruă djru vaccine kiăng tlâ̆o pơgang djop brơi mơnuih ƀu kơnong kơ ƀing ngă bruă pơgang klin pơ anăp đôč ôh. Boh nik ñu mơnuih ƀôn sang pơ kual djuai ania ƀiă dŏ, kual ataih jing anih amuñ biă ƀă klin, yua anih dŏ pơčlah ƀu hơmâo, tơlơi gêh găl pơhlôm, pơgang klin tơnap tap".

Ăt amăng rơwang hrơi tơjuh rơgao mơ̆n, Grup khua mua pơ ala mơnuih ƀôn sang dêh čar mơ̆ng tơring čar Gia Lai hơmâo bưp mơnuih ruah khua pơ  4 boh să kual giăm guai dêh čar kah hăng: Ia Mơr, Ia Ga, Ia Piơr hăng Ia Lâu tơring glông Čư̆ Prong kiăng lăi pơthâo tơlơi pơhing či jơnum lok 2, khua mua pơ ala mơnuih ƀôn sang dêh čar tal XV laih anun čih pioh tơlơi pơgôp hiăp mơ̆ng mơnuih ƀôn sang. Ƀơi hơdôm anih bưp mơnuih ruah khua, mơnuih ƀôn sang ruah khua pơdah pran jua hok mơak ƀơ anăp lu boh tơhnal tŭ yua jơnum lok sa tal XV laih anun ruah khua mua pơprong mơ̆ng anom bruă khua pơ ala mơnuih ƀôn sang dêh čar, kơnuk kơna, lŏn ia rơwang bruă thun 2021-2026 hăng mrô hră plĕ ruah lu soh.

Laih dơ̆ng rơkâo: kiăng pơblih, pơbuă tui hơdôm tơlơi phiăn dêh čar kah hăng: Tơlơi phiăn lŏn tơnah, Tơlơi phiăn hơdră tơgŭ kơđi tơlơi soh pơsit thun 2015, Tơlơi phiăn mut ngă tơhan, Tơlơi phiăn pơkơtưn apah bơni…pioh kơ djop gưl, djop anom bruă amuñ pok pơhai ngă tui hăng dưi pơhrăm sit nik kơ bruă ngă soh glăi tơlơi phiăn dêh čar laih anun djơ̆ găl hăng tơlơi hơdip rơnuk anai. Ăt ngă tui hơdôm hơdră rŭ glăi, pơtrut tơlơi bơwih ƀong huă mơnuih mơnam.

Nao bưp mơnuih ruah khua ƀơi Gia Lai hlâo kơ nao jơnum lok 2 khua mua pơ ala

 mơnuih ƀôn sang dêh čar tal XV

Kơ hơdôm bruă mă tum teč ƀơi tơring čar, mơnuih ruah khua ƀơi tơring čar Gia Lai lăi: Anih anom gru grua phun hơkrŭ Plei Ame kơnuk kơna tŭ yap anih gru grua dêh čar samơ̆ aka ƀu tuh pơ alin man pơdong djơ̆ lăp kiăng pơhưč tuai nao ĕp lăng, čuă jơmư, jơlan glông aka čuk pơkra, sang bruă aka hơmâo, pơsir lŏn dŏ, lŏn ngă hmua kơ mơnuih ƀôn sang djuai ƀiă aka ƀu hơđong. Mơnuih ruah khua ƀơi Gia Lai ăt rơkâo djop sang bruă pơdjơ̆ nao pơđing lăng bruă pok pơhai pơkra pil pơ-iă yang hrơi pơkĕ apui lơtrik, dưm ƀơi bơbung sang, bruă wai lăng hơdôm bruă rông hlô mơnong, tơlơi aka ƀu găl amăng bruă hrăm hră mơ̆ng ataih, lăng amăng tivi…

Boh nik ñu, lu mơnuih ruah khua lăi pơthâo tơlơi pơhing hlor biă mă ñu, bruă pơgang klin covid 19, ngă hiư̆m pă pơsir bruă mă kơ mơnuih mă bruă apah glăi mơ̆ng anih hơmâo klin. Mơnuih ƀôn sang ruah khua, Nguyễn Trường An, dŏ pơ să Ia Lâu, tơring glông Čư̆ Prong lăi:

"Ƀuh rơđah ană bă mơ̆ng tơring plơi pla lơ̆m glăi mơ̆ng kual hơmâo klin tơnap tap biă mă, glăi ƀu dưi rơkâo ĕp bruă mă amăng tơring čar ôh. Sa bơnah dơ̆ng, ră anai lu mơnuih mơ̆ng kual hơmâo klin ăt  hlăk dlăi dơ̆ng mơ̆n tơlơi anai yơh djop gưl anom bruă hlăk dŏ pơmin ĕp hơdră pơsir lăng. Hloh kơ anun, tơlơi hơdip mơda mơnuih ƀôn sang pơ kual giăm guai dêh čar tơnap tap biă mă, čang rơmang kơnuk kơna hơmâo lu jơlan hơdră djru ba, ngă gêh găl kơ djop mơnuih dưi pơđĭ kyar, anăp nao bruă pơtô ba mơnuih ƀôn sang pơđĭ kyar bơwih ƀong huă hăng lu hơdră pla pơjing, čem rông hlô mơnong”.

Mơnuih ruah khua ƀơi Kon Tum rơkâo đĭ hăng grup khua mua pơ ala

mơnuih ƀôn sang dêh čar

Ƀơi tơring čar Kon Tum, Grup khua mua pơ ala mơnuih ƀôn sang dêh čar ƀơi tơring čar anai nao bưp mơnuih ruah khua pơ tơring glông Sa Thầy, Kon Plong hăng Kon Braih ( Kon Rẫy). Mơnuih ruah khua pơdah pran jua tŭ ư hăng tơlơi pơphun jơnum, hơdră mă bruă jơnum lok 2, khua mua pơ ala tal XV; dong yua jơlan hơdră ăt kah hăng tơlơi git gai mơ̆ng kơnuk kơna amăng bruă pơhlôm, pơgang klin Covid 19 laih anun hok mơak mơ̆n lơ̆m ƀuh mơnuih ƀôn sang, biă mă ñu mơnuih tơnap tap kơƀah dưi pơđing nao hăng djru ba hmao kru.

Kơ hơdôm tơlơi hơmâo ƀơi tơring čar, mơnuih ruah khua ƀơi tơring čar Kon Tum čang rơmang tuh pơ alin pơtrut tañ bruă ming pơkra glăi, hơdôm arăt jơlan 24 mơ̆ng tơring kual Măng Đen, tơring glông Kon Plong nao pơ tơring čar Quảng Ngãi. Ăt brơi čơđai sang hră mơnuih djuai ƀiă dưi tŭ mă tơlơi djru prăk huă ƀong dŏ glăi pơ sang hră apah ƀong huă. Kơtưn amăng bruă wai lăng kông ngăn lŏn glai, mă glăi kơčăo bruă tuh pơ alin ƀu tŭ yua ƀơi lŏn kơnuk kơna jao. Pơgăn tơlơi bơbeč sat mơ̆ng sang măi apui lơtrik anet hăng man ƀrô pơdjơ̆ nao amăng tơlơi hơdip mơda ăt kah hăng bruă mă ngă hmua pla pơjing mơ̆ng ană plơi pla.

Amăng bruă wai pơgang glai rưng, mơnuih ruah khua tơring čar Kon Tum rơkâo djop gưl sem lăng, jŭ yap glăi đơ đam lŏn glai dưi jao laih tui hră pơtrun 178 mơ̆ng Kơnuk kơna. Hơmâo jơlan hơdră djru klă hloh kơ mơnuih ƀôn sang djuai ƀiă pơjeh phun pla, hơdră ngă hmua pla pơjing kiăng kơ mơnuih ƀôn sang pla glăi kyâo glai amăng đơ đam lŏn hong rŏng kơdư kla.

Nay Jek: Pơblang