VOV4.Jarai - Hơdôm hrơi laih rơgao, plơi prong Buôn Ma Thuột, Daklak ƀuh na nao mơnuih ƀă klin Covid-19, sit biă ñu, mrô mơnuih ƀă klin yua lar hyu gah rơngiao giăm ha mơkrah mrô mơnuih ƀă klin. Kiăng kơ plai ƀiă ngă tơnap ƀơi hơdôm anih pơčlah pơƀut hăng hơdôm sang ia jrao pơjrao brơi mơnuih ƀă klin Covid-19, plơi prong Buôn Ma Thuột hơmâo pơčlah ƀing mơnuih F1 pơ sang hăng glăk prap kơ bruă pơjrao brơi mơnuih F0 pơ sang. Kơnong mơng akŏ blan 11 thun anai, plơi prong Buôn Ma Thuột ƀuh 500 čô mơnuih ƀă klin Covid-19, amăng anun hơmâo 200 čô mơnuih lar hyu gah rơngiao.

Plơi prong Buôn Ma Thuột pơčlah ƀing mơnuih F1 pơ sang

Amăng lơ 8/11 plơi prong Buôn Ma Thuột hơmâo mơnuih ƀă klin lu hloh amăng sa hrơi lĕ 123 čô mơnuih, amăng anun hơmâo 81 čô mơnuih ƀă hyu lar hyu amăng mơnuih mơnam, đĭ tui mrô mơnuih ƀă klin Covid-19 amăng plơi prong Buôn Ma Thuột lĕ 1.359 čô. Ƀơi anăp kơ tơlơi tơnap tap yua mơnuih ƀă klin đĭ kơtang, plơi prong Buôn Ma Thuột hơmâo pơtrun akŏ bruă pơčlah mă pơ sang hăng ƀing F1 tơdah djơ̆ hăng tơlơi pơkă mơng Ding jum ia jrao. Ră anai hơmâo rơbêh 50 čô mơnuih F1 glăk pơčlah pơ sang. Amăng lơ 8/11, jŭ yap đơ đam tơring čar Daklak hơmâo 287 čô mơnuih ƀă klin Covid-19, amăng anun hơmâo 127 čô lar hyu gah rơngiao. Anai lĕ hrơi hơmâo mơnuih ƀă klin lu hloh dong mơng hlâo anun.

Siu Đoan: Pơblang