VOV4.Jarai - Rơbêh kơ 20 thun pơtô čơđai ƀơi Sang hră gưl 2 Nguyễn Trường Tộ, pơ̆ să Ea H’Đing, tơring glông Čư̆ Mgar, tơring čar Daklak, nai Lương Hữu Hải khă dô̆ sa čô sa jăn ƀơi anih dô̆ apah, samơ̆ hmâo djru laih hơdôm rơtuh čô čơđai ƀun rin huăi pơdơi sang hră ƀah wư. Ƀu djơ̆ kơnong kơ pơtô bôh hră ôh mơ̆, nai dô̆ djru ƀing čơđai mơng ataih hmâo anih dô̆ ƀu apah prăk dong, pơsur arăng djru sum ao, hơdrôm hră, hră čih, rơdêh dang wang brơi kơ ƀing čơđai tơnap tap; čơkă djru ba ƀing čơđai tơnap tap, djru ƀing čơđai nao sang hră kiăng hmâo tơlơi čang rơmang kơ pô.

Dong mơng lu thun hăng anai, ƀơi anih apah dô̆ giăm rơnuč jơlan añep pơ̆ ƀuôn Ea Sang, să Ea H’Đing, tơring glông Čư̆ Mgar, tơring čar Daklak jing laih bơbung sang pơđao mơng ƀing čơđai ƀun rin neh wa djuai ania ƀiă. Hơdôm bôh anih apah dô̆ yua kơ nai Lương Hữu Hải, nai pơtô čơđai tơlơi Anglê, Pô gơgrong bruă grup mơng Sang hră gưl 2 Nguyễn Trường Tộ apah, ƀu djơ̆ kơnong kơ anih dô̆ brơi đôč kơ 30 čô čơđai sang hră ƀun rin ôh mơ̆, dô̆ jing anih nai pơtô brơi gah rơngiao mông nao sang hră dong kơ năng ai 150 čô čơđai sang hră tơnap tap. Hrom hăng anun, nai čơkă djru rông ba lu čơđai tơnap tap hloh. Hăng sa amăng lu čơđai dưi hmâo nai Hải čơkă djru ba, adơi H’ Ba Su Đi Mlô lăi pơthâo:

“Sang anô̆ kâo tơnap tap biă, amĭ ama nao mă bruă pơ̆ anih ataih. Dua adơi amai kâo hăng ơi yă kâo. Mơng hrơi hmâo nai gum djru dong mơng gơnam ƀong huă, sum ao kâo hơdor tơngia kơ nai biă. Kâo amra gir run hrăm hră kiăng nai mơ-ak pran jua”.

Nai Lương Hữu Hải pơtô čơđai hrăm hră

Nai Lương Hữu Hải hmâo pơtô laih čơđai ƀơi Sang hră gưl 2 Nguyễn Trường Tộ, pơ̆ să Ea H’Đing, tơring glông Čư̆ Mgar, tơring čar Daklak rơbêh kơ 20 thun. Anai lĕ sang hră amăng kual djuai ania ƀiă, tơlơi hơdip mơda mơnuih ƀôn sang dô̆ tơnap tap. Lăi kơ hơdôm bruă mă mơng pô, nai Lương Hữu Hải lăi pơthâo:

“Drơi pô kâo hmâo dô̆ laih ƀơi kual Dăp Kơdư mơng anet, mơng thun hrăm anih 3, anih 4. Hlâo adih ăt tơnap tap mơn kiăng kơ dưi nao sang hră, dưi hmâo nai pơtô, ƀing gơyut djru lĕ kâo pơwot glăi pơ̆ anai, kâo ƀuh khom ngă bruă hơget kiăng hơdor glăi pran nai pơtô čơđai. Hăng biă ñu ƀơi kual neh wa djuai ania ƀiă ƀing čơđai tơnap tap biă, bôh nik ñu bruă pơdơi hrăm mơng ƀing čơđai lu biă, anun kâo ƀuh hmâo sa črăn bruă gơgrong djru ƀing čơđai”.

Ơi Bùi Đình Thảo, Khua Sang hră gưl 2 Nguyễn Trường Tộ brơi thâo, ƀơi kual djuai ania ƀiă anai, rim nai pơtô ƀu djơ̆ kơnong kơ pơtô pơhrăm đôč ôh mơ̆ dô̆ hmâo bruă pơsur, gum djru čơđai ƀu pơdơi hrăm hră ƀah wư dong. Lu thun hăng anai, nai Lương Hữu Hải jing pô nai ngă gru hlâo, ba jơlan hlâo amăng ngă tui bruă anai.

“Nai Lương Hữu Hải amăng hơdôm thun phrâo rơgao hmâo laih hơdôm bruă mă rơđah rơđông, biă ñu bruă lăi pơhing pơsur, djru gum gơnam tam anih anom dô̆ kơ čơđai, biă ñu čơđai sang hră ƀun rin yak rơgao tơlơi tơnap ƀơi să Ea H’Đing lăi hrom hăng Sang hră gưl 2 Nguyễn Trường Tộ lăi ha jăn. Nai hmâo yak rơgao laih djop tơlơi tơnap pô, yua kơ nai Hải ră anai ăt tơnap tap mơn, nai dô̆ ha jăn, sang dô̆ ƀu hmâo. Nai ruah laih sa anih dô̆ anet djru kơ ƀing čơđai, biă ñu djru ƀing čơđai ƀun rin ƀu hmâo anih dô̆. Mơmot lĕ nai pơphun pơtô brơi đôč kơ sa dua čơđai jum dar anih pô dô̆. Ƀing gơmơi ăt djru brơi mơn hrơi mông kơ rơdêh mă yua, djru bruă pơphô brơi kơ Gong gai plơi pla hăng bruă mă mơng nai pơtô čơđai"”

Hơdôm rơbâo pok hơdrôm hră dưi hmâo nai Hải rơkâo kiăng ƀơk brơi kơ ƀing čơđai tơnap tap

Ơi Nguyễn Hữu Nhất, Khua Jơnum min mơnuih ƀôn sang să Ea H’Đing brơi thâo rim thun nai Lương Hữu Hải hmâo djru laih, pơsur hmâo năng ai ñu 30 čô čơđai sang hră tơnap tap lui sang hră pơwot glăi sang hră. Dong mơng akô̆ thun hrăm truh ră anai, nai Hải hmâo pơsur laih hơdôm rơbâo akô̆ hơdrôm hră hrăm, sum ao phrâo, rơdêh dang wang... abih bang nua ñu giăm truh 200 klăk prăk djru čơđai sang hră tơnap tap djuai ania ƀiă. Amăng tal klin ruă gluh đĭ phrâo rơgao, nai Hải dô̆ pơsur hmâo 65.000 blah bơnal gôm adung mơbah, rơbêh kơ 460 lit ia jrao pơdjai kơman hăng 21 bôh măi pơkă pơ-iă drơi jăn djru plơi pla pơgang, pơgăn klin ruă.

“Hăng hơdôm bruă mă tô nao rai hăng hơdôm khul grŭp kiăng khăp amăng hăng gah rơngiao tơring čar, nai hmâo đing nao pel ĕp glăi ƀing čơđai djuai ania ƀiă hơđăp ƀơi anai tơnap tap kơ hơdrôm hră hrăm, hră čih, rơdêh đĭ. Nai hmâo tô nao rai hăng ngă tui hơdôm tal hyu gum djru hăng djru brơi kơ lu čơđai sang hră ƀơi să. Amăng bruă pơgang, pơgăn klin Covid-19 ƀơi să, hơdôm hrơi rơgao nai ăt hmâo tô nao rai mơn hăng ƀing thâo rơngia iâu pơthưr, djru brơi anung gơnam kơ mơnuih ƀun rin, tơnap tap, mơnuih khom sô̆ čơlah, guang dar. Iâu pơthưr brơi hơdôm bôh sang hră hơdôm bôh măi pơdjai kơman pơkă lăng pơ-iă drơi jăn, bơnal gôm adung mơbah”.

Hăng pran jua kiăng khăp, nai Lương Hữu Hải hmâo gah lui laih tơlơi mơng pô, kiăng djru brơi hơdôm rơtuh čô čơđai sang hră tơnap tap čang rơmang kơ bruă nao sang hră, jing mơnuih hmâo bôh tŭ yua kơ mơnuih mơnam./.

            Tuấn Anh: Čih – Siu H’ Prăk: Pơblang