VOV4.Jarai - Mơng blan 7 truh rơnuč thun anai amra hmâo ƀiă biă mă ñu ha mơkrah mrô mơnuih mơng 18 thun hăng lu hloh kơ anun dưi tlâ̆o vaccine pơgang Covid-19. Anai lĕ tơlơi pơhing dưi hmâo Ding jum ia jrao dêh čar hăng Ding jum Khul ling tơhan dêh čar ta ba tơbiă amăng mông jơnum blung a mơng Grŭp črâo ba pok pơhai bruă tlâ̆o vaccine pơgang Covid-19 thun 2021-2022 pơphun amăng mơguah lơ 2/7 pơ̆ Hà Nội. Kiăo tui anun, bruă tlâ̆o pơgang dưi ngă tui mơng blan 7 thun anai truh blan 4 thun 2022, amăng anun ƀiă biă mă ñu ha mơkrah mrô mơnuih mơng 18 thun hăng lu hloh kơ anun dưi tlâ̆o vaccine pơgang amăng thun 2021 hăng truh abih 3 blan tal sa thun 2022 hmâo rơbêh kơ 70% mrô mơnuih ƀôn sang dưi tlâ̆o pơgang. Bruă tlâ̆o pơgang klin dưi pok pơhai amăng đơ đam dêh čar ta hăng giăm truh 19.000 anih anom tlâ̆o pơgang hơđong hăng rô hyu. Amăng anun, đing nao hơdôm bôh tơring čar, ƀôn prong glăk hmâo klin ngă, hmâo lu kual sang măi. Amăng tơring čar, ƀôn prong, đing nao tlâ̆o pơgang hlâo kơ hơdôm mơnuih dô̆ ƀơi kual glăk hmâo klin ngă. Lăi rơđah anai lĕ bruă tlâ̆o pơgang hlôm hlâo prong hloh mơng hlâo truh kơ ră anai, Khua Ding jum ia jrao ơi Nguyễn Thanh Long brơi thâo, Ding jum amra gum hrom kơjăp hăng Ding jum Khul ling tơhan hăng hơdôm bôh tơring čar, ƀôn prong mơng bruă tŭ mă, pơgiăng, rak pioh, pơpha hyu vaccine, biă ñu pơhlôm kơjăp tlâ̆o pơgang hlôm hlâo ƀơi rơnoh đuh hlah./.

Siu H’ Prăk: Pô pơblang