VOV4.Jarai - Tơdơi kơ pơgôp hơdôm rơbâo tơ̆n añăm tam, boh troh brơi kơ hơdôm sang anŏ glăk amăng kual hơmâo klin gah dơnung, lu neh met wa amăng tơring čar Dak Nông glăk pla phrâo añăm tam kiăng kơ djru brơi dong mơnuih ƀon sang ƀơi kual hơmâo klin.

Tơdơi kơ djru brơi rơbêh 2 tơ̆n trong dô hăng lu añăm tam, hơbơi, boh troh, sang anŏ ayong Trịnh Văn Khơi, dŏ ƀơi ƀut plơi Thuận Hải, să Thuận Hạnh, tơring glông Dak Song, Dak Nông glăk pla phrâo dong rơbêh 7 ar añăm tam djop mơta kiăng kơ djru brơi dong neh met wa ƀơi kual hơmâo klin. Ayong Khởi brơi thâo, mah sang anŏ ăt bơbeč nao mơn mơng klin Covid-19 samơ̆ ră anai neh met wa ƀơi kual hơmâo klin tơnap tap hloh yua anun ñu ăt gum tơngan hrŏm kiăng kơ djru brơi neh met wa dưi găn rơgao yua kơ klin kheng ngă.

“Sang anŏ gơmơi glăk čoh pơsăn lŏn hmua dŏ glăi kiăng kơ pla dong añăm tam, hơbơi kiăng kơ djru brơi neh met wa glăk bưp tơnap tap. Tơdah klin dŏ lar hyu dong pơ anăp, tui hăng kâo pơmĭn kiăng pơtrut pơsur adơi ayong anong wa pla lu dong añăm tam kah mơng hơmâo dong gơnam djru brơi neh met wa amăng kual hơmâo klin”.

Kar kăi tui anun mơn, yă Nguyễn Thị Năm, dŏ ƀơi să Quảng Tâm, tơring glông Tuy Đức tơdơi kơ jak iâu pơgôp rơbêh 20 tơ̆n añăm tam, hơbơi, boh troh kiăng kơ djru brơi hơdôm tơring čar hơmâo klin. Yă rơkâo ngă jang jai lŏn hmua pla rơbêh 1 ektar añăm kiăng kơ hơmâo dong gơnam djru brơi neh met wa ƀơi kual hơmâo klin.

“Ră anai añăm tam, boh troh glăk kơƀah tui, yua anun kâo rơkâo ngă jang jai lŏn hmua ha guai hăng lŏn hmua sang anŏ gơmơi, pơlir hăng Khul đah kơmơi pok pơhai pla añăm tam, rơtă kiăng kơ djru brơi arăng pơ anăp anai. Kâo pơmĭn hơdôm bruă mă anai amra pơgôp djru brơi tơlơi hơdip kơ mơnuih ƀon sang ƀơi hơdôm kual hơmâo klin kah hăng neh met wa ƀun rin dong”.

Ƀơi să kual ataih Dak Som, tơring glông Dak Glong, anih hơmâo giăm 70% mrô mơnuih djuai ania ƀiă samơ̆ lơ̆m neh met wa pơ ƀôn prong Hồ Chí Minh bưp tơnap tap yua glăk pơčlah mơnuih mơnam, abih bang mơnuih lêng kơ abih pran jua pơgôp añăm tam, boh troh kiăng mơ-it nao. Ơi Bùi Ngọc Tân, Khua jơnum min mơnuih ƀon sang să Dak Som brơi thâo, truh ră anai, neh met wa amăng să hơmâo abih pran pơgôp rơbêh 5 tơ̆n añăm tam, boh troh mơ-it nao mơnuih ƀon sang pơ ƀôn prong Hồ Chí Minh. Lu sang anŏ phrâo pla dong añăm tam kiăng kơ djru brơi dong pơ anăp anai.

“Să Dak Som lĕ să mrô 3, kual tơnap tap biă mă, mrô mơnuih dŏ hơdip ƀơi anai lĕ mơnuih djuai ania ƀiă, hăng lu sang anŏ ƀun rin, giăm ƀun rin. Amăng hơdôm thun laih rơgao, neh met wa amăng să lêng kơ hơmâo arăng djru brơi hră čih, sum ao, braih, ia măm, ngok hra mơng ƀing mơnuih čơmah, kah hăng hơdôm khul grup, mơnuih mơng ƀon prong Hồ Chí Minh. Lơ̆m ƀôn prong Hồ Chí Minh bưp tơnap tap yua klin Covid-19 ngă. Djop sang anŏ mah tơlơi hơdip dŏ tơnap tap samơ̆ hăng pran yua thâo khăp pap hơmâo djru brơi pơtơi, añăm tam, hơbơi, boh troh kiăng kơ mơ-it nao pơ ƀôn prong Hồ Chí Minh”.

Hơdôm rơtuh tơ̆n añăm tam djru brơi mơnuih ƀon prong glăk bơbeč mơng klin hơmâo mơ-it, hrŏm hăng añăm tam mơtah mơda amra tŏ tui pla dong, anai lĕ pran gum pơgôp mơng djop djuai ania amăng tơring čar Dak Nông anăp nao hơdôm tơring čar kual dơnung hăng tơlơi čang rơmang klin amra pơgang hĭ, tơlơi hơdip amra pot glăi tui hơđăp.

Siu Đoan: Pơblang