VOV4.Jarai-Anom bruă lông mă yua lăng ia jrao pơgang blung a, sang bruă ĕp kman duăm ruă dêh čar hơmâo ngă giong laih črăn tal sa tlâ̆o lông lăng vaccine Covivac ƀơi 120 čô mơnuih. Tui hăng kơ-iăng nai tha prin, nai prin tha ơi Vũ Đình Thiểm, Khua anom lông mă yua lăng ia jrao vaccine pơkra mă pô, lơ 15/5 phrâo anai, 120 čô mơnuih pơyơr pran jua brơi tlâ̆o lông lăng hlâo dua arăt ia jrao vaccine Covivac.

Him lăng truh lơ 29/5, grup kơsem min amra lông mă lăng tơhnal drah pioh pơčrang kman, lăng anŏ gơgrong bong glăi hăng kman amăng 14 hrơi tơdơi kơ tlâ̆o lông lăng arăt jrum tal dua mơ̆ng 120 čô mơnuih anun.

Giong anun, abih bang drah hơmâo mă laih ba pơčrang mơ̆ng tal tlâ̆o pơgang arăt jrum tal 1 hăng tal 2 laih anun 14 hrơi tơdơi kơ tlâ̆o pơgang tal 2 amra mơ-it nao pơ dêh čar Canada pioh pơtong lăng anŏ kơtang bong glăi amăng drah hlâo kơ tlâ̆o, pơkă hăng tơdơi kơ tlâ̆o pơgang.

Laih hơmâo boh tơhnal ƀuh bong glăi hăng kman laih anun anŏ hơđong mơ̆ng ia jrao vaccine pơkra mă anai, grup kơsem min amra lăi pơthâo hăng Ding jum ia jrao, rơkâo ngă tui črăn 2. Him lăng črăn 2 amra ngă tui amăng blan 7. Covivac lĕ vaccine Covid 19 yua kơ Sang bruă Vaccine hăng Sinh phẩm ia jrao IVAC kơsem min, pơkra.

Vaccine anai hơmâo lông mă yua lăng črăn sa ƀơi sang hră gưl prong Đại học Y Dược Hà Nội. IVAC mă yua hơdră pơkra vaccine mơ̆ng sơ̆l boh mơnŭ, hơdră pơkra ia jrao phiăn hơmâo mơ̆ng đưm, ngă tui lu hơdră pơkra vaccine pơjrao tơlơi duăm pơtuk hơdrap yua bơblih bơyan.

Nay Jek: Pơblang