VOV4.Jarai - Mơguah hrơi anai lơ 22/12, ƀơi plơi pla Đại tướng Võ Nguyên Giáp, tơring čar Quảng Bình, Khul khua apăn bruă git gai Ping gah, Khua mua pơ ala mơnuih ƀon sang dêh čar, Khua mir sir, Khua mua amăng Kơnuk kơna, Jơnum min djŏp djuai ania mơnuih mơnam Việt Nam hăng tơring čar Quảng Bình pơphun kơdrưh kơang Ngă lơphet 110 thun hrơi tơkeng Đại tướng Võ Nguyên Giáp.

Hrơi ngă lơphet kiăng pơpŭ, hơdor bơni kơ hơdôm tơlơi gum pơgôp prong prin mơng Đại tướng hăng bruă hơkrŭ lŏn ia, pơklaih rơngai djuai ania, pơlir hơbit lŏn ia, akŏ pơdong hăng pơgang ba Lŏn ia Việt Nam xã hội chủ nghĩa; pơsit tơlơi git gai djơ̆ lăp mơng Ping gah Cộng sản Việt Nam, Khua mir sir Hồ Chí Minh hăng ƀing khua git gai bruă hơkrŭ lŏn ia mơng hlâo amăng bruă pơklaih rơngai lŏn ia, rơngai djuai ania, pơlir hơbit lŏn ia hăng akŏ pơdong pơgang ba Lŏn ia. Gong phun jua pơhiăp dêh čar Việt Nam pơdah amăng tivi tui tlôn hlao mông ngă lơphet anai mơng plơi prong Đồng Hới, tơring čar Quảng Bình ƀơi plang pôr pơhing Thời sự VOV1.

Siu H’Mai: Pơblang