VOV4.Jarai - Lơ 15/11, Khul khua apăn bruă Jơnum min djŏp djuai ania mơnuih mơnam Việt Nam hơmâo ngă hră mơ-it kơ Jơnum min djŏp djuai ania mơnuih mơnam Việt Nam djŏp tơring čar, ƀon prong hăng khua mua hơdôm khul đăo kơ hrơi ngă lơphet hơ-ŭ kơ ƀing djai yua Covid-19. Hră pơtrun lăi rơđah, Ngă lơphet hơ-ŭ kơ mơnuih djai yua klin Covid-19 hơmâo pơphun kiăng hơ-ŭ kơ rơbêh 2 pluh rơbâo čô mơnuih ƀon sang, kan ƀô̆, ling tơhan amăng dêh čar ta djai yua klin Covid-19 ngă; pơdah tơlơi rơngôt hning, thâo pap brơi tơlơi rơngiă rơngom prong, tơlơi rơngôt mơng hơdôm pluh rơbâo boh sang anŏ hơmâo mơnuih djai rơngiă, bang hyu pran jua thâo pap, thâo hơdor, juh alum pran jua kơ ƀing adơi ayong glăk dŏ pơgang klin Covid-19. Anai ăt jing hrơi kiăng pơtrut tui gru grua gum pơgôp nao rai, pran jua gir kơtir mơng djuai ania ta, găn rơgao hrơi mông tơnap tap, lông lăng, dưi hơdip hrŏm hăng dưi pơgang klin Covid-19, pơjing glăi tơlơi bơwih ƀong huă, sĭ mơdrô, pơđĭ kyar bơwih ƀong huă - mơnuih mơnam, akŏ pơdong hăng pơgang Lŏn ia.

Siu H’Mai: Pơblang