VOV4.Jarai - Ngă Lơphet hơdor glăi neh wa hăng mơnuih apăn bruă, ling tơhan rơngiă amăng tal klin Covid-19 yua kơ Jơnum min djop djuai ania mơnuih mơnam dêh čar Việt Nam hăng Jơnum min mơnuih ƀôn sang ƀôn prong Hồ Chí Minh gum hrom pơphun amra pok phun lom 8 mông mơmot anai (19/11) ƀơi 2 anih anom tô nao rai Hà Nội hăng ƀôn prong Hồ Chí Minh. Amăng giăm truh 2 thun rơgao, klin Covid-19 gluh đĭ hmâo bơdjơ̆ nao prong laih đơ đam rŏng lŏn tơnah, amăng anun hmâo dêh čar ta. Khă abih bang Ping gah, abih bang ling tơhan, abih bang mơnuih ƀôn sang gum hrom abih pran jua “kơdŏng klin hăng kơdŏng ayăt”, yua pran jua hăng pơhlôm tơlơi hơdip mơnuih ƀôn sang blung a, blung hlâo, samơ̆ klin ruă ngă kơtang biă mă, akă hmâo mơng hlâo. Rơbêh kơ 1 klăk čô mơnuih ƀă Covid-19; klin hmâo ngă rơngiă laih rơbêh kơ 23 rơbâo čô mơnuih. Năng ai ñu 8 mông 30 mơnit mơmot anai, ƀơi ƀôn prong Hồ Chí Minh, Hà Nội amra ha amăng plĕ pơphun bruă tuĭ ñang, apui hlin, tlaih apui kơđen dian bơnga. Hơdôm anih anom jơnum khul đăo rơyuh teng leng hơdor glăi, hơdôm bôh rơdêh treng, ƀat tô ƀơi hơdôm glông jơlan pơ̆ ƀôn prong Hồ Chí Minh amra tit prep, ƀơi lu anih, mơnuih ƀôn sang dưi pơtrut pơsur djai apui kơđen, tuĭ apui hlin hơdor glăi./.

Siu H’ Prăk: Pô pơblang