VOV4.Jarai - Mơguah lơ 2/7, ƀơi Hà Nội, pơphun Jơnum lăng nao rai amăng tivi đơ đam dêh čar kiăng kơ lăng glăi bruă mă amăng 6 blan akŏ thun hăng pok pơhai bruă mă amăng 6 blan rơnuč thun mơng gơnong bruă pơphun bruă mă. Khua ding jum pơphun bruă mă Phạm Thị Thanh Trà git gai jơnum. 6 blan laih rơgao, gơnong bruă pơphun bruă mă hơmâo gơgrong pơphô bruă, gum pơgôp prong prin amăng pơphun ruah Khua mua pơ ala mơnuih ƀon sang dêh čar tal 15 hăng Khua jơnum min pơ ala mơnuih ƀon sang djop gưl rơwang thun 2021-2026; ƀu pơdơi pơplih phrâo boh tơhnal, hơdră git gai, wai lăng, kiăo tui tơlơi pơsit mơng Jơnum Ping gah dêh čar tal 13 hăng Jơnum Ping gah ƀơi ƀon lan. Amăng mông jơnum, Khua mua pơ ala gơnang bruă pơphun bruă mă djop tơring čar, ƀôn prong pơlăi nao rai hơdôm tơlơi tơnap tap, gun găn lơ̆m pơphun ngă tui hơdôm tơlơi pơsit mơng Kơnuk kơna kơ bruă mă, mơnuih apăn bruă, mrô mơnuih mă bruă; dưm dăp glăi anih anom mă bruă  … Ƀing khua mua rơkâo, Ding jum pơphun bruă mă kiăng hơmâo hră pơ-ar črâo ba tong ten dong kiăng djop tơring čar, gơnong bruă ngă tui.

Đĭ pơhiăp amăng mông pơđut jơnum, Khua ding jum pơphun bruă mă Phạm Thị Thanh Trà rơkâo: thun blan laih rơgao, gơnong bruă pơphun bruă mă djop tơring čar, ƀôn prong kiăng kiăo tui tơlơi pơsit mơng Jơnum Ping gah dêh čar tal 13, mơng Ding jum pơphun bruă mă, djop ƀon lan kiăng pơplih phrâo boh tơhnal, hơdră pok pơhai bruă mă, hmư̆ tơlơi rơkâo đĭ, pơlăi nao rai hăng Ding jum pơphun bruă mă kiăng kơ hơmâo hơdră pơsir hĭ bruă tơnap tap.

Siu Đoan: Pơblang