VOV4.Jarai-Lơ 9/6, Khua dêh čar, ơi Phạm Minh Chính hơmâo kĭ hră pơsit bruă bơblih khua mua, pơđĭ ơi Đỗ Tiến Sỹ, ngă khua Gong phun jua pơhiăp Việt Nam VOV. Rơđah biă ñu, pơsit bơblih bruă, pơđĭ khua ơi Đỗ Tiến Sỹ-ding kơna apăn bruă ping gah dêh čar, Khua git gai Ping gah tơring čar Hưng Yên rơwang bruă thun 2020-2025, Khua grup pơ ala mơnuih ƀôn sang dêh čar tal XIV tơring čar Hưng Yên glăi ngă khua Gong phun jua pơhiăp Việt Nam. Hră pơsit dưi ngă tui mơtam dơ̆ng mơ̆ng lơ 9/6.

Ơi Đỗ Tiến Sỹ thun tơkeng 1965, plơi pla phun să Đình Dù, tơring glông Văn Lâm, tơring čar Hưng Yên. Ngă ding kơna apăn bruă ping gah dêh čar tal XII, tal XIII, ngă pô pơ ala mơnuih ƀôn sang dêh čar tal XIV. Tơlơi hrăm bruă kơđi čar : Cử nhân; Tơlơi hrăm gah bruă mă :

Thạc sĩ wai lăng gah bruă sĭ mơdrô, Cử nhân sư phạm toán. Hlâo kơ ngă khua Gong phun jua pơhiăp Việt Nam VOV, ơi Đỗ Tiến Sỹ hơmâo găn rơgao lu bruă mă: Kơ-iăng Khua git gai ping gah, Kơ-iăng khua phun git gai ping gah tơring čar, truh ngă khua git gai ping gah tơring čar Hưng Yên, Khua jơnum min pơ ala mơnuih ƀôn sang tơring čar Hưng Yên.

Nay Jek: Pơblang