VOV4.Jarai - Mơguah 10/9, ƀơi Hà Nội, Grup jak iâu mơnuih ƀon sang - Anom git gai dêh čar pơhlôm, pơgang klin Covid-19 pơphun Jơnum pok pơhai bruă hyu jak iâu, gum pơčruh “Abih bang mơnuih ƀon sang gum pơgôp, abih pran pơgang klin Covid-19”. Khua apăn bruă git gai Ping gah, Khua Jơnum min djŏp djuai ania mơnuih mơnam Việt Nam ơi Đỗ Văn Chiến, Khua Grup git gai mông Jơnum brơi thâo, kiăng iâu pơthưr tơlơi gum pơgôp pioh pơgang klin, Grup jak iâu mơnuih ƀon sang amra pơƀut hyu jak iâu, pơtrut pơsur ƀing khua, mơnuih mă bruă kơnuk kơna, mơnuih mă bruă gah rơngiao djru rim čô mơnuih aset hloh lĕ prăk ha hrơi mă bruă pioh kơ bruă pơgang klin. Hrŏm hăng anun, jak iâu hơdôm anom bơwih ƀong, khul grup, mơnuih mơnam djru ba añăm pơtăm, akan hơdang kơ mơnuih ƀon sang pơ plơi pla dŏ pơčlah mơnuih mơnam, anih dŏ pơčlah, anih pơjrao mơnuih ƀă kman Covid-19. Laih dong, grup amra pơphun bruă djru asơi huă hơdor tơngiă, djru ba ƀing tơnap tap yua klin ngă.

Siu H’Mai: Pơblang