VOV4.Jarai-Mơguah lơ 7/12, ƀơi sang bruă ping gah dêh čar, Khua git gai ping gah ơi Nguyễn Phú Trọng hơmâo tŭ jum ơi Saysomphon Phomvihan hăng grup khua mua pơ ala mơnuih ƀôn sang dêh čar Lao. Khua git gai pơ ala mơnuih ƀôn sang dêh čar Lao lăi pơthâo hăng ơi Nguyễn Phú Trọng Khua git gai ping gah dêh čar ta, kơ tơlơi pơhing ƀơi dêh čar Lao phrâo anai, biă mă ñu ngă tui Hră pơtrun jơnum ping gah dêh čar Lao tal XI; boh tơhnal kơ tơlơi bơkơtuai hăng ơi Vương Đình Huệ Khua git gai pơ ala mơnuih ƀôn sang dêh čar laih anun jơnum bơkơtuai boh thâo phrâo, hrăm nao rai tơdruă bruă mă pơ ala mơnuih ƀôn sang dêh čar.

Ñu lăi, khua mua pơ ala mơnuih ƀôn sang dêh čar Lao amra ngă hrom hăng khua mua pơ ala mơnuih ƀôn sang dêh čar Việt Nam ngă tui tŭ yua hơdôm tơlơi pơkôl kơplah wah khua mua dua bơnah ping gah, dua bơnah anom bruă pơ ala mơnuih ƀôn sang dêh čar. Khua git gai ping gah ơi Nguyễn Phú Trọng lăi, Việt Nam dong yua biă mă tơlơi bưp nao rai hrăm tơdruă bruă mă hăng pơtruh nao rai tơlơi pơhing mơ̆ng dua bơnah ping gah mơnuih ƀôn sang hơkrŭ dêh čar Lao, tơlơi git gai mơ̆ng kơnuk kơna, laih anun krăo lăng mơ̆ng khua mua pơ ala mơnuih ƀôn sang, mơnuih ƀôn sang Lao ăt tŭ mă lu boh tơhnal pơblih phrâo, prong hloh, ngă tui truh kih Hră pơtrun jơnum ping gah dêh čar Lao tal XI.

Nay Jek: Pơblang