VOV4.Jarai-Mơguah lơ 26/8, ơi Phạm Minh Chính Khua dêh čar nao ĕp lăng hơdôm anih dŏ pơčlah či să phường pioh kơ ƀing F0 hăng F1 ƀơi Thủ Đức, ƀôn prong HCM. Khua dêh čar nao ĕp lăng bruă bơwih brơi tơlơi hơdip mơda mơnuih mơnam ječ ameč dưm ƀơi Sang gru grua thâo thăi phường Cát Lái.

Tui hăng ơi Nguyễn Minh Điền, Khua git gai Ping gah phường Cát Lái, Phường hơmâo 47  grup ƀut plơi amăng ƀôn prong, rơbêh 6000 boh sang anŏ. Djru 400 čô mơnuih mă bruă pơhlôm brơi gơnam ƀong huă, nao sang čơ blơi gơnam kơ mơnuih ƀôn sang. Hơdôm sang anŏ giăm ƀun rin hơmâo djru ba 3 wơ̆t, sa wơ̆t djru 1 klăk 500 prăk. Ră anai, phường dŏ 2 boh anih hŭi rơhyưt hloh.

Laih hmư̆ lăi pơthâo bruă mă ƀơi phường Cát Lái, Khua dêh čar pơtrun hiăp amăng hrơi blan ƀôn prong ngă tui hơdră kom tơbiă hyu khut khăt pioh mă ia khak djop mơnuih ba pơčrang kman klin, pơčlah hĭ ƀing F0, hrom hăng anun ăt khom pơhlôm hơđong tơlơi hơdip mơda mơnuih mơnam. Mơnuih ƀôn sang khom hơmâo ia jrao pơgang tañ. Khua dêh čar lăi, khom akŏ pơjing anih khua git gai phung, sang ia jrao hyu pơjrao tơl sang, ƀu kơnong pơjrao tơlơi ruă Covid đôč ôh, lu tơlơi ruă duăm pơkŏn hai.

Khua dêh čar nao ĕp lăng kơdung djru mơnuih mơnam kah hăng kơdung braih, mơnong ƀong huă, ia jrao gun amra ƀơk kơ mơnuih ƀôn sang 3 hrơi sa wơ̆t. Khua dêh čar pơtrun hiăp kơ Phường prăp lui djru mơnuih ƀôn sang ƀu djơ̆ sa wơ̆t hrơi tơjuh ôh, sui hloh kiăng djop mơnong ƀong huă sit pơčlah mơnuih mơnam ƀu dưi tơbiă hyu.

Nay Jek: Pơblang