VOV4.Jarai - Ƀrô hrơi jơnum prong Phật đản Phật lịch 2565, thun 2021 hăng ngă lơphet 40 thun Hrơi akŏ pơdong Khul đăo phơ̆t Việt Nam (1981-2021), mơguah lơ 19/5, ƀơi Hà Nội, Ding kơna Ding jum kơđi čar, Kơ-iăng khua pơ ala mơnuih ƀon sang dêh čar ơi Trần Thanh Mẫn nao čuă, hơ-ơč kơ khua đăo Thích Thanh Nhiễu, Kơ-iăng khua Khul wai lăng đăo Phơ̆t Việt Nam, hrŏm hăng Anom bruă 1 gah Khul đăo phơ̆t Việt Nam gơnong dlông. Pơ ala kơ ƀing khua Ping gah, Kơnuk kơna, ơi Trần Thanh Mẫn hơ-ơč hmưi kơ abih bang khua đăo, ƀing tui tơlơi đăo Việt Nam hiam drơi jăn na nao, hơ-ơč hmưi kơ Khul đăo phơ̆t Việt Nam čơkă bơyan ngui ngor Phật đản yâo mơ-ak, hơmâo tơlơi khăp ƀu-eng, gum pơgôp nao rai djuai ania ta. Lăi nao klin Covid-19 glăk hơđuh đĭ hăng kơtang biă amăng hrơi mông plĕ hră ruah khua pơ ala mơnuih ƀon sang dêh čar hăng khua pơ ala mơnuih ƀon sang djŏp gưl, ơi Trần Thanh Mẫn čang rơmang Khul đăo phơ̆t Việt Nam iâu pơthưr ơi phơ̆t yă yơng, mơnuih tui đăo, mơnuih ƀon sang nao plĕ rơnuk rơnua, klă hiam; laih dong čang rơmang ƀing khua đăo lĕ mơnuih hơmâo anăn ba ruah ngă khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl  rơwang thun 2021-2026 tơdah dưi ngă khua amra gơgrong bruă, tơlơi pơhiăp hơmâo mơnuih ƀon sang hmư̆ hloh, lăi pơthâo tơlơi kiăng, tơlơi čang rơmang mơng mơnuih ƀon sang kiăng Ping gah hăng Kơnuk kơna lăng ba.

Siu H’Mai: Pơblang