VOV4.Jarai - Mơguah lơ 23/11, ơi Võ Văn Thưởng, Ding kơna Ding jum kơđi čar, Khua apăn bruă Ping gah dêh čar hăng ƀing khua pơ ala mơnuih ƀon sang ƀôn prong Đà Nẵng hơmâo mông bưp mơnuih ƀon sang 5 boh kuận Hải Châu, Thanh Khê, Sơn Trà, Ngũ Hành Sơn hăng Cẩm Lệ, ƀôn prong Đà Nẵng kiăng kơ lăi pơthâo hơdôm boh tơhnal mơng jơnum lok 2, Khua pơ ala mơnuih ƀon sang dêh čar tal XV. Lu bruă hơmâo mơnuih ƀon sang đing nao pơgôp hiăp amăng mông bưp anun lĕ pơgăn bruă hưp ƀong kông ngăn brơi kơ khut khăt ƀiă dong; kiăng kơ hơmâo hơdră bruă brơi kơ ƀing mơnuih mă bruă ƀu djơ̆ sit nik ƀơi ƀon lan. Kơ bruă pơgang klin Covid-19, mơnuih ƀon sang rơkâo pok pơhai tañ bruă djru, pok prong kiăng kơ lu mơnuih bơdjơ̆ nao kơtang mơng klin dưi tŭ mă hơdôm hơdră djru. Ơi Võ Văn Thưởng, Khua apăn bruă Ping gah dêh čar pơsit tong: Gơnong glông, Ding jum kơđi čar lêng kơ đing nao bruă pơđĭ kyar amăng ƀôn prong Đà Nẵng. Amăng hrơi blan pơphun bruă mă, Ping gah, gong gai ƀôn prong kiăng gir run, hơmâo hơdră pơđĭ kyar hơđong kjăp.

Siu Đoan: Pơblang