VOV4.Jarai-Tlam lơ 11/4, ƀơi Hà Nội, Ding jum Pơtô hăng Pơjuăt, Anom bruă Khua khul tơdăm dra mut phung rơnuk Hồ Chí Minh, Anom bruă Khul ia jrao kyâo bơrơkal mriah Việt Nam, Kơčăo bruă djru ia rơgơi tơlơi pơmin gah mrô Việt ngă hrŏm hơdră anăn “Tơlơi čang rơmang mơ̆ng adơi”.

Kơ-iăng Khua dêh čar, ơi Vũ Đức Đam nao jơnum hrom. Hơdră “Tơlơi čang rơmang mơ̆ng adơi” kiăng lăi pơthâo, bang bơngač lu hloh, iâu pơthưr djru kơ bruă pơđĭ tui mơnuih mă bruă pơtô hrăm ƀơi kual tơnap tap, kual ataih, kual mơnuih djuai ƀiă.

Pơhiăp ƀơi mông jơnum, ơi Vũ Đức Đam Kơ-iăng Khua dêh čar brơi thâo, hrom hăng tơlơi djru mơ̆ng kơnuk kơna, hơmâo tơlơi gum tơngan hrom mơ̆ng djop sang  bruă, anom bruă, khul grup, mơnuih mơnam amra djru ngă bơblih tui mơnong ƀong huă hơmâo pran, jơman đok hăng bơblih anih hơdip jum dar hrăm hră kơ čơđai sang hră, nai pơtô ƀơi kual ataih, kual čư̆ siăng dlông, kual mơnuih djuai ƀiă dŏ.

Tơlơi anai amra djru hrom pơtrut ngă tui tơlơi čang rơmang prong, akŏ pơdong Việt Nam jing sa boh dêh čar pơdrong asah hing ang.

Nay Jek: Pơblang