VOV4.Jarai-Ƀrô djơ̆ hơdor glăi hrơi mơnuih ngă bruă sĭ mơdrô Việt Nam, tlam mơmŏt lơ 12/10, ơi Vương Đình Huệ Khua git gai pơ ala mơnuih ƀôn sang dêh čar bưp ƀô̆ mơta khul mơnuih ngă bruă sĭ mơdrô amăng tal jơnum bơkơtuai nao rai ƀing khua mua ngă bruă sĭ mơdrô Việt Nam hăng pơpŭ kơ anăn gơnam sĭ mơdrô hmư̆ hing.

Khua git gai pơ ala mơnuih ƀôn sang dêh čar ơi Vương Đình Huệ bưp khul khua mua djop anom bruă sĭ mơdrô

Čih pioh tơlơi pơgôp hiăp mơ̆ng ƀing ngă bruă sĭ mơdrô, Khua git gai pơ ala mơnuih ƀôn sang dêh čar ta ơi Vương Đình Huệ lăi lĕ, anai jing jơlan hơdră mơ̆ng Ping gah, kơnuk kơna, khua mua pơ ala mơnuih ƀôn sang dêh čar ta ngă tui amăng črăn anăp nao rŭ glăi pơtrut bơwih ƀong huă pơđĭ kyar hơđong kjăp.

Akŏ bruă pơblih glăi tơlơi bơwih ƀong huă mơ̆ng 5 thun pơ anăp, ăt kah hăng akŏ bruă mơ̆ng akŏ thun 2022, Jơnum min apăn bruă git gai pơ ala mơnuih ƀôn sang dêh čar pơčrông sai, tŭ ư lu biă mă, dăp glăi bruă bơwih ƀong huă lir hơbit hăng hơdră pơkă abih bang bong glăi djơ̆, rŭ glăi hăng pơđĭ kyar bơwih ƀong huă mơnuih mơnam, kơtưn bruă mă pơphun hlâo  mơ̆ng atur tơlơi bơwih ƀong huă, hnong dưi gơgrong, bong glăi anŏ pơblih, tơlơi bơbeč djơ̆ ƀu hơđong bơwih ƀong huă mơ̆ng gah rongiao ƀudah hơdôm tơlơi pơdjơ̆ nao anŏ pơblih ayuh hyiăng ƀudah klin kheng ngă.

Nay Jek: Pơblang