VOV4.Jarai-Ƀrô nao jơnum khua mua pơ ala mơnuih ƀôn sang djop dêh čar rŏng tơnah tal 5, ơi Vương Đình Huệ Khua git gai pơ ala mơnuih ƀôn sang dêh čar ta hơmâo bưp Kơ-iăng khua pơ ala mơnuih ƀôn sang gơnong yŭ dêh čar Angle, yă Eleanor Laing. Ơi Vương Đình Huệ lăi pơtong, dêh čar Angle jing bơnah ngă hrom sĭ mơdrô dong tal 3 mơ̆ng Việt Nam ƀơi kual Mi kô̆, Hră pơkôl sĭ mơdrô rơngai dưi ngă tui mơ̆ng lơ 1/5/2021, ngă gêh găl pơtrut kơtang hloh sĭ mơdrô nao rai dua bơnah.

Truh ră anai, dêh čar Angle, hơmâo 421 kơčăo bruă tuh pơ alin pơ Việt Nam, hăng rơnoh prăk truh kơ 3 klai 92 klăk dolar Mi. Khua git gai pơ ala mơnuih ƀôn sang dêh čar ta ơi Vương Đình Huệ lăi pơtong, Việt Nam dong yua Angle kơtưn tơlơi ngă giăng mah sĭ mơdrô amăng kual laih anun amra djru dêh čar Angle amăng bruă bơkơtuai pioh ngă hrom Hră pơkôl sĭ mơdrô hlom bom laih anun hluh gah amăng kual ia rơsĭ Thái Bình Dương.

Khua git gai pơ ala mơnuih ƀôn sang dêh čar ta ơi Vương Đình Huệ lăi lĕ, dua bơnah dêh čar khom gleng nao kơ bruă pơkra hơdră ngă hrom tŭ yua hloh, lăp hăng tơlơi gêh găl laih anun tơlơi rô nao rai ngă giăng mah dua bơnah dêh čar hơmâo laih mơ̆ng hlâo.

Nay Jek: Pơblang