VOV4.Jarai-Mơguah lơ 4/11, Khua git gai pơ ala mơnuih ƀôn sang dêh čar ơi Vương Đình Huệ git gai jơnum pok pơhai ngă tui hơdră krăo lăng mơ̆ng khua mua pơ ala mơnuih ƀôn sang dêh čar hăng Jơnum min apăn bruă git gai pơ ala mơnuih ƀôn sang dêh čar amăng thun 2022. Jơnum anai dưi pơtruh nao rai hăng 63 bit anih pơƀuh nao rai amăng tivi hăng hơdôm tơring čar, ƀôn prong amăng dêh čar.

Khua git gai pơ ala mơnuih ƀôn sang dêh čar ơi Vương Đình Huệ

git gai mông jơnum

Pơhiăp amăng mông jơnum, Khua git gai pơ ala mơnuih ƀôn sang dêh čar ơi Vương Đình Huệ brơi thâo, thun blan rơgao, Jơnum min git gai pơ ala mơnuih ƀôn sang dêh čar hơmâo pơtum pran jua, pioh lu hrơi mông, bruă mă, prăp lui krăo lăng bruă mă amăng gong gai kơnuk kơna. Amăng thun 2022, khua mua pơ ala mơnuih ƀôn sang dêh čar ăt amra pơphun ngă tui 4 wơ̆t krăo lăng kơčăo bruă pơprong phun, amăng anun 2 wơ̆t krăo lăng dlông hloh mơ̆ng khua pơ ala mơnuih ƀôn sang dêh čar, kơčăo bruă krăo lăng ngă tui jơlan hơdră, tơlơi phiăn mơ̆ng kơnuk kơna kơ bruă pơkă hnong plơi pla dơ̆ng mơ̆ng Tơlơi phiăn pơkă hnong kăng guai dưi ngă tui, bruă ngă tui tơlơi phiăn jơlan hơdră pơkrem, pơgăn tơlơi phăk phai mơ̆ng thun 2016-2021.

Amăng pă wơ̆t ĕp lăng, Jơnum min apăn bruă git gai pơ ala mơnuih ƀôn sang dêh čar hơmâo akŏ bruă pơtum lu anom bruă pơ ala mơnuih ƀôn sang dêh čar, laih dơ̆ng jao bruă mă kơ 63 grup pơ ala mơnuih ƀôn sang dêh čar ƀơi tơring čar, ƀôn prong hăng 63 boh anom bruă pơ ala mơnuih ƀôn sang tơring čar, ƀôn prong ngă hrom; pơtum abih bang pran jua bruă mă mơ̆ng anom bruă kơnuk kơna djop tơring čar, ƀon prong ngă hrom.

Nay Jek: Pơblang