VOV4.Jarai-Tlam lơ 5/9, ơi Vương Đình Huệ, Khua git gai pơ ala mơnuih ƀôn sang dêh čar ta hăng grup khua mua mơ̆ng anom bruă pơ ala mơnuih ƀôn sang dêh čar nao truh laih pơ tơdron rơdêh por Schwechat, plơi prong jưh jom Viên, dêh čar Áo či jơnum hrom khua git gai pơ ala mơnuih ƀôn sang djop dêh čar amăng rŏng lŏn tơnah, nao čuă hăng mă bruă tom anom bruă khua pơ ala mơnuih ƀôn sang kual Mi kô̆ EP, čuă dêh čar Bỉ hăng dêh čar Phần Lan.

Khua git gai pơ ala mơnuih ƀôn sang bưp khua mua anih pơ ala

Việt Nam ƀơi dêh čar Áo

Tui hăng akŏ bruă tơdơi kơ nao pơ dêh čar Áo, ơi Vương Đình Huệ nao bưp ră ruai tom khua mua anih jưh pơ ala Việt Nam ƀơi dêh čar Áo; ƀing pơ ala mơnuih ƀôn sang Việt Nam ƀơi dêh čar Áo, Czech, Hungary, Slovakia. Anai dưi lăng kah hăng mông bưp mơnuih ruah khua phara biă mă mơ̆ng khua git gai pơ ala mơnuih ƀôn sang dêh čar hăng mơnuih ƀôn sang ta dŏ pơ tač rơngiao. Nao jơnum hrom khua mua pơ ala mơnuih ƀôn sang djop dêh čar ƀơi rŏng lŏn tơnah tal 5, ƀơi mông jơnum abih bang, ơi Vương Đình Huệ amra đĭ pơhiăp hăng tơlơi čih yôm lăi nao kơ jơlan hơdră mơ̆ng Việt Nam.

Hrom hăng anun, ƀing ding kơna amăng grup khua mua Việt Nam amra bơkơtuai hrom hơdôm bruă pơdjơ̆ nao kah hăng:  pơgang ayuh hyiăng anih dŏ jum dar, bơblih bruă mă hăng mrô, tơlơi bơkơnar đah rơkơi đah kơmơi; jao tơlơi dưi kơ đah kơmơi hăng ƀing hlăk ai, tơlơi phiăn jar kmar laih anun lu tơlơi pơkŏn amăng rŏng lŏn tơnah. Amăng mông jơnum, ơi Vương Đình Huệ dŏ bưp hăng dua bơnah khua mua git gai pơ ala mơnuih ƀôn sang djop dêh čar hơdôm bơnah ngă hrom yôm gru grua mơ̆ng đưm hăng Việt Nam.

Anai lĕ mông gêh găl klă, kiăng ba tơlơi pơhing mơ̆ng Việt Nam truh pơ djop khua mua dêh čar tač rơngiao, pơtrut tơlơi ngă giăng mah gru grua, ăt kah hăng lu tơlơi bơwih ƀong huă, sĭ mơdrô, tuh pơ alin, boh thâo phrâo, pơtô hrăm, tơlơi kơhnâo kơhnăk laih anun bruă ngă giăng mah gơyut gơyâo hăng djop dêh čar.

Nay Jek: Pơblang