VOV4.Jarai - Ƀơi anăp klin kheng jai hrơi kơtang tui, tơring čar Dak Lăk hơmâo akŏ pơdong Sang ia jrao tơhan pơdong jăng jai mrô 2 (hơmâo 1.500 boh sưng đih, pơdong ƀơi Sang hră hrăm bruă kơđi čar tơring Dak Lăk, mrô 1, Nguyễn Lương Bằng, phường Tân Hòa, plơi prong Buôn Ma Thuột) pioh pơjrao brơi ƀing ƀă klin Covid-19. Pơhlôm kơ sang ia jrao tañ dưi ngă bruă, amăng 2 hrơi lơ 31/10 hăng lơ 1/11, kông ti apui lơtrik Dak Lăk brơi mơnuih nao lăng, dưm truă, dăng hrĕ apui bơwih brơi Sang ia jrao tơhan pơdong jăng jai mrô 2.

Kông ñơn pơkra apui lơtrik brơi sang ia jrao tơhan pơdong jăng jai mrô 2.

Anom bruă hơmâo pơkra ming apui amăng sang, plih hĭ hrĕ dăng apui pơđuăi jua tơdu, pơđĭ tui jua apui pơđuăi đĭ trun truh 400kVA hăng prăp lui sa boh măi pơđom lui dong. Truh 5 mông tlam lơ 1/11, bruă pơkra apui brơi Sang ia jrao hơmâo ngă giong laih, prăp lui djŏp mơta kiăng Sang ia jrao dưi čơkă mơnuih nao pơjrao.

Siu H’Mai: Pơblang