VOV4.Jarai - Hrơi tơjuh, lơ 23/5 pơ anăp anai, mơnuih ƀon sang tơring čar Dak Nông amra nao plĕ hră ƀơi 680 anih pơphun plĕ hră. Djru brơi hrơi plĕ hră yôm phăn anai, Kông ti apui lơtrik Dak Nông hơmâo pok pơhai ha amăng plĕ lu hơdră pơhlôm brơi apui lơtrik yua hlâo hăng tơdơi kơ hrơi plĕ hră ruah khua.

Măi pơđuăi apui lơtrik prap lui mơng PC Dak Nông

Anai lĕ tơring čar giăm guai lŏn ia hơmâo kual lŏn mơnai prong, hrĕ apui lơtrik dăng găng hyu hăng kơčong čư̆, samơ̆, hơdôm anom bruă apui lơtrik ƀơi tơring čar Dak Nông hơmâo pơphun bruă pel ĕp tơhrơi mlăm, biă mă ñu lĕ ƀơi hơdôm glông hră apui lơtrik akŏ phun. Laih dong, djop khul grup hơmâo prap lui djop mơta kiăng kơ prap lui gơnam tam măi mok tơdah hơmâo anih răm rai kiăng hmao tlôn pơkra ming.

Pel ĕp anih pĕ pơđuăi apui lơtrik ƀơi anih plĕ hră să giăm guai Quảng Trực, Tuy Đức

Hơdôm anom bruă ăt pơpha mơnuih dŏ gak, prap lui măi pơđuăi apui lơtrik jang jai ƀơi hơdôm anih plĕ hră. Hăng bruă prap lui tui anun,anom bruă apui lơtrik Dak Nông đăo gơnang pơhlôm hơđong apui lơtrik yua, pơgôp brơi kơ hrơi pơphun plĕ hră dưi pơphun hiam klă.

Siu Đoan: Pơblang