VOV4.Jarai -  Sang bruă apui lơtrik tơring čar Daklak phrâo pơphun ƀơk brơi 4 bôh sang khăp păp kơ hơdôm bôh sang anô̆ tơnap tap ƀơi să Ea Ktur (tơring glông Čư̆ Kuiñ), să Čư̆ Kpô (tơring glông Krông Ƀuk) hăng să Ea Bông (tơring glông Krông Ana). Rim sang dưi hmâo sang bruă djru 60 klăk prăk, sang anô̆ hăng hơdôm grŭp plơi pla gum hơgôp pran mă bruă hăng prăk kiăng pơdŏng klă hiam hloh tui tơlơi kiăng mă yua. Mut dô̆ sang phrâo, amai H’ Nuyn Êban, ƀơi ƀôn Jung A, să Ea Ktur, tơring glông Čư̆ Kuiñ, ol kơdol pran jua lăi:

PC Daklak ƀơk sang dô̆ khăp păp kơ sang anô̆ amai H’ Nuyn Êban

“Kâo mơ-ak biă yua kơ mơng ră anai hmâo sang phrâo dô̆ laih. Hlâo adih sang anô̆ kâo dô̆ jăng jai sang tơ̆i, ră anai kâo ƀu dô̆ bơngot dong tah sit truh adai hơjan ƀudah pơ-iă. Kâo rơkâo bơni hơdôm gưl lu biă hmâo pơdŏng laih sang dô̆ kơ sang anô̆ kâo”.

Ơi Trần Văn Thuận, Khua Sang bruă apui lơtrik tơring čar Daklak, brơi thâo, pơtrut kơtang bruă hơđong tơlơi hơdip mơnuih mơnam ƀrô djơ̆ tal hơdor glăi 45 thun pơdŏng anom bruă, amăng thun anai, hrom hăng hơdôm bruă mă ƀơk gơnam tam kơ hơdôm bôh anom phun pơgăn klin, djru keh prăk pơgang, pơgăn klin Covid-19..., sang bruă dô̆ djru rơbêh kơ 400 klăk prăk pioh pơdong 6 bôh sang khăp păp djru hơdôm bôh sang anô̆ tơnap tap./.

Siu H’ Prăk: Pô pơblang