VOV4.Jarai - Čơtlăm lơ 28/12, ƀơi plơi prong Buôn Ma Thuột, Sang bruă apui lơtrik Daklak hmâo pơphun ngă Lơphet hơdor glăi 45 thun hrơi pơdŏng (28/12/1976 – 28/12/2021) hăng čơkă Hră bơni mơng Khua dêh čar. Găn rơgao 45 thun pơjing pơdŏng hăng pơđĭ kyar, truh ră anai PC Daklak glăk wai lăng mă yua rơbêh kơ 450 km jơlan gŏng hrĕ apui lơtrik 110 kV; rơbêh kơ 4.000 km jơlan hrĕ apui găp ƀrô; 6.200 bôh anom pơplih pơkĕ apui; djru pơkĕ apui brơi rơbêh kơ 574.000 rơbâo čô mơnuih blơi yua ƀơi Daklak, hmâo giăm truh abih bang mrô mơnuih hmâo apui mă yua.

Thun anai, khă klin ruă Covid-19 ngă tơnap, sang bruă ăt pơhrui hmâo mơn rơbêh kơ 3.260 klai prăk; nô̆p kơ ngăn drăp kơnuk kơna 50 klai prăk. Hrom hăng anun bruă bơwih ƀong sĭ mơdrô, PC Daklak hmâo laih lu bruă mă hơđong tơlơi hơdip mơda mơnuih mơnam, anăp nao plơi pla. Kơnong kơ amăng 5 thun jê̆ hăng anai, Sang bruă hmâo pioh laih 3 klai 600 klăk prăk kơ bruă mơnuih mơnam – gum djru ƀơi tơring čar. Kơnong amăng thun 2021, abih bang mrô prăk ngă tui bruă anai hmâo rơbêh kơ 880 klăk prăk. Ƀrô djơ̆ tal hơdor glăi 45 thun hrơi pơdŏng, PC Daklak hmâo ư-ang dưi hmâo Khua dêh čar ƀơk hră bơni./.  

Siu H’ Prăk: Pơblang