VOV4.Jarai-Tlam mơmŏt lơ 20/8, Khua dêh čar ơi Phạm Minh Chính hơmâo pơhiăp telephôn bơkơtuai hăng Khua phun, git gai kông ty Pfizer, ơi Albert Bourla kơ bruă ngă hrom vaccine.

Khua dêh čar ơi Phạm Minh Chính lăi pơtong kơnuk kơna Việt Nam glăk ngă tui kơtang hơdôm bruă kiăng hơmâo vaccine, pok pơhai bruă mă tlâ̆o pơgang kơ đơ đam dêh čar, kiăng truh akŏ thun 2022 dưi tlâ̆o pơgang djop brơi kơ 70% mrô mơnuih ƀôn sang, pơhlôm brơi tơlơi hơdip mơda hơđong kơ mơnuih ƀôn sang. Yua kơ anun, Khua dêh čar ơi Phạm Minh Chính rơkâo anom bruă Pfizer djru hlâo, gleng nao laih anun pơtrut hloh bruă jao vaccine kơ Việt Nam tui hăng hră rơkâo blơi, bơ tŭ ư laih.

Khua phun, anom bruă Pfizer ƀuăn amra gir run abih pran jua, ĕp djop hơdră pơtrut jao vaccine kơ Việt Nam amăng blan 8 anai, blan 9 hăng 3 blan tal IV thun 2021; amra djru, gum ba Việt Nam dưi tŭ mă rơnoh sĭ glăi jao ia vaccine mơ̆ng dêh čar pơkŏn aka mă yua brơi kơ Việt Nam; gir run dong yua bruă kơnuk kơna Mi djru kơ Việt Nam gah ia jrao vaccine.

Nay Jek: Pơblang