VOV4.Jarai-Ngă tui tơlơi pơtrun mơ̆ng Khua dêh čar, Ding jum kông an hlăk pok pơhai bruă pơkra plăk ƀudah rup plăk kăn kươk dưm čip kơ ană plơi pla amăng dêh čar. Plăk kăn kươk anai mơnuih ƀôn sang dưi mă yua pơhaih tong ten kơ pô jing hơmâo anăn ană plơi pla Việt Nam amăng đơ đam dêh čar Việt Nam ta pô. Mơ̆ng ră anai truh lơ 1/7/2021, gir run ngă giong pơkra rup kăn kươk kơ 50 klăk čô mơnuih, hơmâo dưm čip, kiăng ba glăi boh tŭ yua  amăng bruă kơnuk kơna wai lăng mơnuih ƀôn sang hơmâo rup kăn kươk, ngă gêh gal kơ mơnuih ƀôn sang ngă hră pơar  amăng bruă mă jĕ giăm pơtom hiăp tơdruă mơnuih ƀôn sang ƀudah hăng sang bruă kơnuk kơna; anăp nao kơ bruă akŏ pơdong kơnuk kơna mă bruă hăng điện tử, wai lăng djop bruă hăng điện tử soh, pơtrut bơwih ƀong huă mơnuih mơnam amăng dêh čar đĭ kyar; djru hrom ngă bruă pơhlôm, pơgang tơlơi soh sat.

Yua kơ anun, hiư̆m ñu rup kăn kươk dưm čip ƀudah tă lăi plăk kơ mơnuih ƀôn sang? Mơnuih ƀôn sang hơmâo tơlơi dưi hăng bruă ngă hơgĕt kơ rup kăn kươk anun? Yua hơgĕt khom ngă hră rup kăn kươk dưm čip hlâo kơ lơ 1/7/2021.

Plă kăn kươk mơnuih ƀôn sang dêh čar jing sa amăng hơdôm mơta rup pơhaih tơlơi pơhing kơ drơi jăn mơ̆ng rĭm čô mơnuih ƀôn sang Việt Nam. Anai lĕ hơdră ngă phrâo, pơkra hră rup pơhaih tơlơi pơhing kơ drơi jăn mơnuih ƀôn sang, pơphun dưm čip hơmâo pơkra brơi laih, hơmâo anih đa ngă tui mơ̆ng thun 2016.

Tui hăng Tơlơi phiăn rup kăn kươk thun 2014, mơnuih ƀôn sang djop 14 thun pơngŏ khom ngă hră rup kăn kươk hrup hră tut tơngan jing rup kak ta juăt lăi. Rup kăn kươk dưi pơhaih tơlơi pơhing klah čun kơ drơi jăn, anăn pô mơnuih ƀôn sang dêh čar Việt Nam, amra dưi mă yua pơhrua pơ hră passport tơdah hơdôm dêh čar Việt Nam ngă hră pơkôl jar kmar brơi dua bơnah dưi mă yua rup kăn kươk mơnuih ƀôn sang pơ ala kơ passport ta juăt lăi hộ chiếu.

Thun 2016, Việt Nam brơi bơblih hră rup kak jing rup kăn kươk tui gru pơkă. Truh akŏ thun 2021, rup kăn kươk hơmâo gru pơkă ăt bơblih dưm čip amăng đơ đam dêh čar. Rup kăn kươk dưm čip ră anai hơmâo 12 mrô. Mrô rup kăn kươk jing mrô pơkă anăn akŏ tlôn yap mơ̆ng rĭm čô mơnuih ƀôn sang nao ngă hră rup blung a truh pơ rơnuč.

Tui hăng mơta tơlơi 13 Hră pơtrun 137/2015/NĐ-CP mơ̆ng kơnuk kơna, glông mrô hơmâo 12 mrô, čih tong ten 6 boh mrô amăng nun 3 boh mrô blung a pơkă mrô tơring čar, ƀôn prong gah gơnong dlông wai lăng ƀudah gru mrô dêh čar anih pô rup kăn kươk čih anăn pơhaih thun tơkeng; 1 boh mrô tŏ tui jing mrô gru rơnuk thun tơkeng rai hăng mrô pơkă đah rơkơi bơnai; 2 boh mrô tŏ tui dơ̆ng lĕ gru pơkă thun tơkeng mơ̆ng pô rup kăn kươk mơnuih ƀôn sang hăng 6 boh mrô rơnuč lĕ jing mrô dăp akŏ klôn tŭ djơ̆ mă.

Bơhmutu: mrô kăn kươk mơnuih ƀôn sang tui anai, 037153000257:

-Mrô 037 lĕ jing mrô bơkơnăl tơring čar Ninh Bình

-Mrô 1 lĕ pơthâo pô rup anun đah kơmơi, tơkeng rơnuk thun 20

-Mrô 53 lĕ pô rup arăng tơkeng thun 1953

-Mrô 000257 lĕ mrô yap tŭ ñu djơ̆ mă. Gru tơhnal amăng rup kăn kươk ƀu dưi bơblih dơ̆ng tah, wơ̆t hăng pô rup anun rơkâo ngă glăi rup kăn kươk phrâo hai tơdah ñu ngă rơngiă hĭ rup kăn kươk ñu, ƀudah bơblih anih dŏ, tơlơi pơhing akŏ sang anih nao dŏ phrâo.

Ră anai, anŏ phara kơ hơjăn rĭm čô mơnuih mơ̆ng rup kăn kươk dưm čip lĕ hơmâo 4 mơta hră rup drơi jăn dưi mă yua phara samơ̆ hrup soh, anun lĕ hră rup kak hơmâo 9 mrô, hră kak hơmâo 12 mrô, rup kăn kươk gru rek hăng rup kăn kươk dưm čip. Tui hăng tơlơi phiăn kơnuk kơna, hră rup kak 9 mrô dưi mă yua amăng 15 thun đôč yap mơ̆ng hrơi arăng ngă brơi, bơ rup kăn kươk lĕ dưi bơblih tơl pô anun djop 25 thun ha wơ̆t, 40 thun ha wơ̆t bơblih laih anun truh 60 thun bơblih dơ̆ng.

Tơdah hră kak, rup kăn kươk ăt dŏ amăng hrơi blan mă yua lĕ mơnuih ƀôn sang ăt dŏ mă yua kak anun tŭ mơ̆n. Dêh čar ta anăp nao abih bang mă yua sa hnong hră pơar rup kak anun lĕ rup kăn kươk dưm čip ƀudah plăk kăn kươk hơmâo čip.

Lăi glăi kơ tơlơi tơña mơ̆ng mơnuih ƀôn sang kiăng biă mơ̆n hă, glăi pơ anih ta pô čih anăn akŏ sang pioh ngă hră rơkâo ngă rup plăk kăn kươk dưm čip? Thượng tá, ơi Tô Anh Dũng, Khua anom bruă wai lăng mrô amăng dêh čar kơ plơi pla anih dŏ mơnuih ƀôn sang, Ding jum kông an brơi thâo:

"Ră anai, Ding jum kông an hlăk git gai anom bruă kông an 63 boh tơring čar, ƀôn prong gah gơnong dlông kơ bruă ngă rup plăk kăn kươk dưm čip brơi mơnuih ƀôn sang yua, dŏ pơ anih dŏ mă bruă jăng jai tŭ mơ̆n. Mơnuih ƀôn sang dưi mơ̆n nao pơ anih giăm hloh rơkâo ngă rup kăn kươk ƀu tơguan glăi pơ anih čih anăn hră akŏ sang plơi pla hơđăp ôh”.

Pô hlơi arăng gleng nao hlâo hloh?

“Ding jum kông an hlăk pơsur abih bang mơnuih ƀôn sang dêh čar nao ngă rup kăn kươk tal anai yua dah rup kăn kươk dưm čip hăng điện tử anai dưi mă yua, lơ̆m hyu ngă hră pơar amăng kơnuk kơna gêh găl, anăp nao bruă kiăng ngă mơ̆ng Ding jum kông an lĕ bơwih brơi kơ mơnuih ƀôn sang dêh čar pơsir tañ hăng klă hloh lơ̆m ngă hră pơar ƀu tơguan pơdah thâo lu hră pơkŏn ôh”.

Tơdah mơnuih ƀôn sang dêh čar phrâo ngă rup kăn kươk gru rek pơkă, kiăng ngă glăi ruk kăn kươk dưm čip phrâo dưi mơ̆n  ?

“Hrăk kak ƀudah rup kăn kươk dưm gru rek 12 mrô hơđăp ăt dưi mă yua laih anun aka abih hrơi blan mă yua ôh dŏ mă yua đôč”.

Yua hơgĕt kông an djop tơring čar, ƀôn prong khom ngă hră rup kăn kươk tal anai, ngă bruă wơ̆t hrơi mlam ƀu pơdơi ôh tui anun ?

“Bruă kiăng ngă mơ̆ng Ding jum kông an lĕ gir run kiăng ngă brơi djop 50 klăk rup kăn kươk dưm čip truh lơ 1/7/2021. Kah hăng ƀing ta thâo laih, lơ 1/7/2021 lĕ Tơlơi phiăn anih dŏ dưi ngă tui hăng hơdôm bruă kiăng ngă hră pơar kiăng pơhrŏ hĭ mrô hră pơar či pơdah thâo lơ̆m ngă bruă. Tơdơi kơ lơ 1/7/2021, Ding jum kông an amra ngă hrom hơdôm ding jum, anom bruă pơkŏn, yua kơ anun, kiăng bơwih brơi klă hloh ngă hră pơar wai lăng mơnuih ƀôn sang khom mă yua điện tử, anăp nao kơnuk kơna mă bruă hăng điện tử laih anun wai lăng bơwih ƀong huă hăng mrô Ding jum kông an hơmâo git gai 63 boh tơring čar, kơtưn ngă brơi rup kăn kươk dưm čip điện tử mơ̆ng ră anai truh lơ 1/7/2021 kiăng bơwih brơi kơ mơnuih ƀôn sang".

Nay Jek: Pơblang