VOV4.Jarai - Ring bruă dơnao pơkŏng ia Krông Pač hlao, tơring čar Daklak lĕ ring bruă prong, prăk tuh pơ alin rơbêh 4.400 klai prăk, samơ̆ bưp lu tơnap tap yua kơ găn rơgao 12 thun man pơkra ƀuh lu bruă ngă soh. Bruă ngă soh prong hloh ră anai lĕ bruă ba mơnuih ƀon sang nao pơdong plơi pla phrâo. Đa mơnuih kiăng nao mơ̆ ƀu hơmâo anih dŏ, ƀing mơnuih nao dŏ laih samơ̆ ƀuh hơđong amăng tơlơi hơdip ƀơi anih phrâo. Lơ̆m anun, amăng bơyan hơjan hlim amra hơmâo lu tơlơi ngă hŭi rơhyưt.

Ơi Vàng Seo Pao lĕ sa amăng hơdôm sang anŏ blung a ƀơi kual dơnao ia Krông Pač hlao, să Čư̆ San, tơring glông M’Drak nao dŏ pơ plơi pla phrâo pơdong mrô 1, să Čư̆ Elang, tơring glông Ea Kar, Daklak. Ơi Pao arăng ruah ngă kơ-iăng khua plơi amăng hơdôm hrơi dŏ tơguăn akŏ pơjing plơi phrâo sit nik. Ñu brơi thâo, amăng hơdôm hrơi blung a, mrô sang anŏ nao dŏ pơ plơi pla phrâo pơdong lu, samơ̆ ră anai aset tui, rĭm wŏt hrơi tơjuh ƀuh kơnong 1-2 boh sang anŏ. Ba truh tơlơi anai lĕ yua bơdjơ̆ nao bruă kah pha lŏn ngă hmua kơ neh met wa. Sa, dua boh sang anŏ phrâo nao dŏ arăng kơnong brơi lŏn pơdong sang, mơ̆ aka ƀu hơmâo lŏn ngă hmua. Sa, dua boh sang anŏ arăng jao lŏn ngă hmua samơ̆ aka ƀu djop tui akŏ bruă tơring čar pơtrun. Lơ̆m anun, đa sang anŏ jao lŏn samơ̆ hơmâo mơnuih rai sua mă yua anun aka ƀu dưi ngă hmua. Ơi Seo Pao, bơngŏt brơi thâo, bruă anai amra ngă tơnap tap kơ bruă pơdong plơi pla phrâo pơ anăp anai.

“Sa, dua boh sang anŏ rai dŏ, sang pŭ rai laih samơ̆ lŏn ngă hmua ƀu hơmâo, bruă kah pha lŏn ngă hmua aka ƀu klă ôh. Ră anai aka čuk lŏn brơi bơkơnar, tơnap lơ̆m rai dŏ. Lu mơnuih brơi thâo kiăng kâo rơkâo đĭ khul git gai akŏ bruă tơring čar tañ čuk rơmet lŏn hmua kiăng kơ amuñ pla pơjing, mơ̆ tui ră anai ƀing gơmơi aka ƀu thâo hơdip hiưm pă ôh. Khut git gai akŏ bruă tơring čar ngă hiưm pă aka ƀu ƀuh, bruă anet tui anai aka ƀu dưi ngă mơ̆ 500 boh sang anŏ amra hơdip hiưm pă”.

Bruă pơdong plơi pla phrâo mơng ring bruă dơnao pơkŏng ia Krông Pač hlâo dŏ lu tơlơi gun

Ơi Trần Văn Thanh, Khua Jơnum min mơnuih ƀon sang să Čư̆ Elang, tơring glông Ea Kar brơi thâo, truh lơ 19/8, să hơmâo čơkă 130 boh sang anŏ rai dŏ, giăm 600 čô mơnuih ƀơi să Čư̆ San, tơring glông M’Drak nao dŏ pơ plơi pla phrâo pơdong mrô 1. Ră anai, ƀuh sa, dua bruă ngă tơnap kơ mơnuih ƀon sang lơ̆m ƀuh bơrơssua lŏn hăng hơdôm sang anŏ phrâo rai dŏ. Mah să hrŏm hăng hơdôm anom bruă bơdjơ̆ nao amăng tơring glông nao pơsir hĭ, lăi pơthâo bruă bơrơsua lĕ ƀu djơ̆ hăng tơlơi phiăn ôh. Samơ̆ mơnuih ƀon sang ăt aka ƀu tŭ, yua anun hơmâo jao anom bruă kông ang pơsir hĭ, gir run ƀu brơi bơbeč nao bruă pơdong plơi pla phrâo brơi neh met wa.

“Hơmâo lu wŏt hyu pơtô pơblang, pơtrut pơsur, jak iâu Jơnum min mơnuih ƀon sang tơring čar să mă bruă, ƀu hơmâo tơlơi pơkă pơpă ôh pơsit anai lĕ lŏn ƀing gơñu, samơ̆ ƀing gơñu ăt ƀu tŭ lơi. Hră pơ-ar ƀing gơmơi glăk čih pơkra giong hăng pơdah djop tơlơi kiăng kơ mơ-it nao Kông ang tơring glông pơsir djơ̆ hăng tơlơi phiăn. Tơdah ƀing gơñu ăt bơrơsua lŏn amra bơbeč sat nao ƀing mơnuih rai dŏ. Yua anun ƀing gơmơi ăt hmao tlôn pơ alum pran jua neh met wa, pơsur neh met wa lŏn hơmâo jao brơi neh met wa khŏm ngă yơh, bơ ƀing gơmơi amra wai pơgang ngă ƀuăn amra pơhlôm rơnuk rơnua laih dong hrŏm hăng neh met wa pơsir hĭ hơdôm tơlơi ngă tơnap tap”.

Kiăng pơsir hĭ abih hơdôm tơlơi gun ƀơi hơdôm plơi pla phrâo pơdong kiăng kơ hơmâo tơlơi tŭ ư mơng mơnuih ƀon sang

Hrŏm hăng plơi pla phrâo pơdong mrô 1, tơring čar Daklak ăt hơmâo pơdong plơi pla mrô 2 brơi mơnuih ƀon sang mơng kual dơnao pơkŏng ia Krông Pač hlao, ƀơi să Čư̆ Bông, tơring glông Ea Kar. Samơ̆, tui hăng anom bruă ngă hmua hăng pơđĭ kyar ƀon lan tơring glông Ea Kar, plơi pla phrâo mrô 2, ăt aka ƀu brơi mơnuih ƀon sang nao dŏ yua glăk dŏ tơguăn čuk rơmet agaih hăng tuh pơ alin man pơkra.

Kơ bruă kaih ba mơnuih ƀon sang nao dŏ, pô pơ ala brơi anom bruă tuh pơ alin, ơi Phạm Văn Hạ, Khua anom bruă wai lăng akŏ bruă man pơkra ring bruă ngă hmua hăng jơlan glông Daklak brơi thâo, plơi pla phrâo pơdong mrô 1 hăng 2 hlâo anun jao Jơnum min mơnuih ƀon sang tơring glông Ea Kar (anom bruă tuh pơ alin hơđăp) ngă. Bruă man pơkra hlâo anun hơmâo lu tơlơi ngă soh ngă kơ anom bruă anai wai lăng tơnap tap biă mă. Ƀơi plơi phrâo pơdong mrô 1, hră lơkak hmua pơdai prong 22 ektar hăng pok prong 110 ektar hơmâo Jơnum min mơnuih ƀon sang tơring glông Ea Kar pơphun nao kă lăng samơ̆ truh ră anai abih bang file lơkak rơngiă abih. Bruă anai ngă tơnap kiăng kơ pơplih glăi hră lơkak hăng bơbeč nao bruă mă yua lŏn. Kiăng kơ hơmâo mrô jŭ yap tong ten, khŏm pơphun kă glăi lŏn. Bơ ƀơi plơi phrâo pơdong mrô 2 ră anai glăk tuh pơ alin man pơkra anih anom, jơlan glông ƀơi anih pơdong sang dŏ. Bơ lŏn ngă hmua, glăk mơ-it hră pơ-ar rơkâo djop gưl tŭ yua hăng mă yua lŏn glai rưng.

Bơyan hơjan hlim thun 2020, kual jum dar dơnao pơkŏng ia Krông Pač hlao hơmâo 5 wŏt ia lip, bruă ba đuăi mơnuih ƀon sang ră anai, hơmâo Daklak pơphun khut khăt

Ơi Phạm Văn Hạ brơi thâo, Ping gah tơring čar, Jơnum min mơnuih ƀon sang tơring čar glăk git gai khut khăt,  djop gơnong bruă, djop gưl glăk gir run pơsir hĭ bruă truh rơnuč thun anai amra pơgiong bruă mă glăi lŏn ƀơi dơnao pơkŏng ia hăng man pơdong plơi pla phrâo brơi rơbêh 700 boh sang anŏ, giăm 4.000 čô mơnuih. Kơ bruă hŭi ia lip amăng bơyan hơjan hlim, ơi Hạ brơi thâo:

“Rơnuč thun amra ƀuh ia lip hăng ƀing gơmơi amra hơmâo hơdră pơsir hĭ tơlơi anai. Ră anai, bruă yôm phun lĕ ba đuăi mơnuih ƀon sang, hơdôm sang anŏ giăm dơnao ia, pơhmutu lĕ nao dŏ pơ anih glông 486 met pơ glông lơ̆m ia prong amra huăi bơbeč nao ôh. Mơnuih ƀon sang pơ gŭ anun amra ba đuăi abih. Ƀing gơmơi pơsit hrơi mông ngă aka ƀu sui ôh, pơhlôm brơi mơnuih ƀon sang, lơ̆m neh met wa dŏ tơguăn giăm 10 thun anai laih, mơnuih ƀon sang tañ nao dŏ pơ plơi pla phrâo pơdong amra plai ƀiă tơnap, tơlơi hơdip tañ hơđong”.

Tơdơi kơ 12 thun dŏ tơguăn, ring bruă dơnao pơkŏng ia hơdôm klai prăk Krông Pač hlao dưi man pơkra, mơnuih ƀon sang tŭ ư nao dŏ pơ plơi pla phrâo. Samơ̆, bruă ba mơnuih ƀon sang nao dŏ pơ anih phrâo ră anai bưp tơnaptap yua kơ lŏn dŏ aka čuk bơkơnar hăng lŏn ngă hmua aka ƀu hơmâo. Kiăng kơ mơnuih ƀon sang hơđong nao dŏ pơ plơi pla phrâo, gưl gong gai tơring čar Daklak kiăng kơ tañ pơsir hĭ tơnap tap, gun găn ră anai. Tơlơi khut khăt kiăng pơsit tong hăng bruă mă laih dong pơphun mơng gưl tơring čar truh pơ tơring glông, să, tui anun kah mơng dưi, ba glăi tơlơi đăo gơnang mơng mơnuih ƀon sang.

Siu Đoan: Pơblang