VOV4.Jarai - Lơ 27/8, tơring čar Dak Lăk pơphun akŏ bruă pơčrang kman SARS-CoV-2 tañ kơ abih bang mơnuih amăng plơi prong Buôn Ma Thuột kiăng kah đuăi mơnuih ƀă kman F0 amăng plơi pla. Amăng hrơi blung a, plơi prong Buôn Ma Thuột hơmâo pơčrang brơi năng ai 10 rơbâo boh sang anŏ ƀơi dua boh phường Thống Nhất hăng Tự An hăng 62 anih mă ia adung ba pơčrang. Ơi Đoàn Ngọc Thượng, Kơ-iăng khua Jơnum min mơnuih ƀon sang plơi prong Buôn Ma Thuột brơi thâo, kiăng bruă pơčrang kman Covid-19 pơhlôm djơ̆ hơdră, plơi prong hơmâo akŏ pơdong 70 grup mă ia adung pơčrang kman hăng 2 grup đuăi nao rai lu anih pơčrang kman SARS-CoV-2 kơ mơnuih ƀon sang ƀơi 21 boh să, phường. Rim grup hơmâo pơčrang kman brơi năng ai 400 čô mơnuih amăng ha hrơi. Hrơi pơčrang kman amra ngă giong mơng 5 truh 7 hrơi, hăng mrô mơnuih hơmâo pơčrang kman lĕ 375.000 čô mơnuih. Lơ 27/8, ƀơi hơdôm grup pơčrang kman phường Thống Nhất hăng Tự An aka ƀu hơmâo pô hlơi ôh ƀă kman SARS-CoV-2.

Mơnuih ƀon sang phường Thống Nhất test hmar amăng lơ 27/8

Siu H’Mai: Pơblang

Dơ̆ng mơ̆ng 6 mông tlam lơ 26/8, plơi prong Ƀuôn Ma Thuôt, tơring čar Dak Lak hơmâo ngă tui hơdră pơčlah mơnuih mơnam tui Hră pơčrâo mrô 16. Tui hăng anun, amăng 5 hrơi blung a, plơi prong brơi mơnuih ƀôn sang dŏ amăng sang đôč ƀu dưi tơbiă pơ rơngiao ƀơi jơlan glông ôh, pioh pơtum brơi mă ia khak pơčrang kman.

Amăng hơdôm hrơi anai, plơi prong Ƀuôn Ma Thuôt jao kơ djop să, phường, akŏ pơjing anih sĭ mơdrô siêu thị anet tŭ mă gơnam sĭ mơdrô ƀu rơngiă prăk ôh, djru sang anŏ ƀun rin tơnap tap laih anun djru hyu blơi brơi gơnam kơ mơnuih ƀôn sang kiăng djru. Tal blung a, djop siêu thị, anih sĭ mơdrô prong amăng plơi prong Ƀuôn Ma Thuôt ngă tui hơdră sĭ mơdrô čih rơnoh gơnam sĭ mơdrô abih sa anung dưm lu mơta gơnam hăng rơnoh mơ̆ng 100 rơbâo truh 500 rơbâo kiăng djru mơnuih ƀôn sang.

Ră anai, 5 boh anom bruă dưi sĭ mơdrô djơh hăng anai kah hăng siêu thị Go Ƀuôn Ma Thuôt, siêu tị Co.opmart Ƀuôn Ma Thuôt, siêu thị MM Mega Ƀuôn Ma Thuôt, hơdôm ruăi sang sĭ mơdrô Vinmart, sang sĭ mơdrô Bách hoá xanh amra ngă tui hơdră sĭ mơdrô online pơtruh nao rai amăng internet, sĭ mơdrô tui anung gơnam pơtep rơnoh prăk hlâo laih anun, hơmâo mơnuih shipper, pơgiăng nao gơnam tơl sang.

Nay Jek: Pơblang