VOV4.Jarai-Ƀơi anăp kơ tơlơi pơhing tơnap tap klin kheng Covid 19 ngă, ƀuh na nao anih lu mơnuih ƀă klin amăng plơi pla, tlam lơ 24/10, Jơnum min mơnuih ƀôn sang plơi prong Ƀuôn Ma Thuôt, Dak Lak hơmâo ngă hră pơtrun, djop sang sĭ mơdrô mơnong ƀong huă, anih ngui ngor mơñum tơpai asơi, sang sĭ mơdrô mơñum ia kơphê pơtum lu mơnuih brơi pơdơi abih yơh jăng jai, kơnong sĭ blơi ba glăi pơ sang mơñum.

Sa boh anih plơi pla amăng Ƀuôn Ma Thuôt, khom guang dar hĭ yua hơmâo lu mơnuih ƀă klin Covid 19 amăng plơi pla

Hrơi blan ngă tui mơ̆ng 6 mông tlam lơ 25/10 truh abih lơ 10/11/2021. Hlâo kơ anun, lơ 21/10, Jơnum min mơnuih ƀôn sang plơi prong Ƀuôn Ma Thuôt hơmâo ngă hră pơtrun djơh hăng anai lu wơ̆t laih kiăng ngă gêh găl kơ djop sang sĭ mơdrô hăng kơtưn ngă bruă pơgang klin Covid 19 amăng plơi prong. Ƀơi Dak Lak, amăng 2 hrơi mlam rơgao.

Yap mơ̆ng 4 mông tlam lơ 23/10 truh 4 mông tlam lơ 24/10, đơ đam tơring čar hơmâo 93 čô mơnuih ƀă kman sars-cov-2, kơnong plơi prong Ƀuôn Hô lu hloh hơmâo truh 50 čô, tơring glông Čư̆ Mgar 19 čô, plơi prong Ƀuôn Ma Thuôt, 13 čô, tơring glông Čư̆ Kuin 11 čô.

Nay Jek: Pơblang