VOV4.Jarai-Yap mơ̆ng 12 mông yang hrơi dơ̆ng lơ 6/8, plơi prong Gia Nghĩa, Dak Nông pơđut yơh bruă pơčlah mơnuih mơnam tui Hră pơčrâo mrô 16 mơ̆ng Khua dêh čar, ngă tui hră pơčrâo 15 dơ̆ng, kiăng pơhlôm, pơgang klin.

Gia Nghĩa ăt djă pioh 5 bit anih pơgăn jơlan mut nao rai amăng plơi prong

 Amăng 14 hrơi ngă tui hơdră guang dar, plơi prong Gia Nghĩa ƀu hơmâo mơnuih ƀă phrâo ôh kman sars-cov-2 amăng plơi pla. Mơnuih ƀôn sang ƀơi anih ƀuh mơnuih ƀă klin, arăng mă ia khak ba pơčrang abih lêng kơ ƀu kman klin ôh.

Samơ̆, ƀơi anăp kơ klin kheng tơnap tap, tơlơi ƀă hyu ăt dŏ kơtang, plơi prong ăt djă bong 5 bit anih pơgăn jơlan pioh ĕp lăng klin kheng djop jơlan mut nao amăng plơi prong. Ăt ngă tui tơlơi pơtrun pơdơi abih pơtum lu mơnuih rơbêh 20 čô sa boh anih.

Gah rơngiao kơ anih mă bruă, sang hră, sang ia jrao ƀu pơtum 10 čô dŏ giăm nao rai ôh, pơdơi abih jơnum kuh pơpŭ tơlơi đăo, bruă mă pơtum 20 čô pơngŏ.

Nay Jek: Pơblang