VOV4.Jarai - Amăng rơwang hrơi tơjuh laih rơgao, pơphun Jơnum lăng nao rai mơng ataih đơ đam dêh čar kiăng kơ lăng glăi bruă pơphun plĕ hră ruah Khua pơ ala mơnuih ƀon sang dêh čar tal XV hăng khua jơnum min pơ ala mơnuih ƀon sang djop gưl rơwang thun 2021-2026. Nao jơnum hrŏm ƀơi Ƀirô bruă mă hơmâo Khua git gai pơ ala mơnuih ƀon sang dêh čar, ƀing khua mua pơkŏn, khua git gai Ping gah, Kơnuk kơna, khua hơdôm ding jum, gơnong bruă…hăng khua mua djop tơring čar amăng đơ đam dêh čar. Khua git gai pơ ala mơnuih ƀon sang dêh čar ơi Vương Đình Huệ, Khua khul pơphun plĕ hră lăi pơtong, pơ-ư ang biă mă hăng hơdôm boh than dưi ngă amăng tal plĕ hră laih rơgao.

Amăng mông jơnum, ƀing khua mua hơmâo pơlăi nao rai tơlơi găn rơgao, tơlơi pơčeh phrâo amăng bruă mă, sit biă ñu amăng hrơi blan klin Covid-19 glăk tơnap tap ră anai. Tui hăng Khua Jơnum min mơnuih ƀon sang tơring čar  Bắc Giang Lê Ánh Dương, tơlơi yôm phăn amăng tal plĕ hră anai lĕ hơmâo lu tơlơi gôm pơgôp yôm phăn, pơdah rơđah tơlơi gơgrong amăng bruă mă, thâo pơčeh phrâo mơng djop Khul grup pơphun plĕ hră amăng tơring čar Bắc Giang:

Ƀing ding kơna amăng grup plĕ hră buh sum ao pioh pơgang klin, arăng pơpha jing rĭm grup, ba hyu kơthung plĕ hră tơl sang anŏ, tơl hơdôm sang anŏ glăk ngă tui hơdră pơčlah, bruă anai lêng pơhlôm rơnuk rơnua hloh. Bruă mă ăt glêh glar, samơ̆ ƀing ding kơna amăng grup djru pơphun plĕ hră hăng mơnuih ƀon sang lêng kơ ngă tui abih prong jua kiăng kơ găn rơgao tơnap tap mơng anun dưi pơphun plĕ hră hiam klă. Hơdôm rup rap anun, ngă ol kơdol pran jua mơnuih ƀon sang, jing rup rap ƀu thâo wơr ôh amăng tal plĕ hră anai”.

Lăng glăi tơlơi truh kih amăng hrơi plĕ hră ruah Khua mua pơ ala mơnuih ƀon sang dêh čar tal XV, khua jơnum min pơ ala mơnuih ƀon sang djop gưl rơwang thun 2021-2026 mơng Jơnum min djop djuai ania mơnuih mơnam Việt Nam, ơi Đỗ Văn Chiến, Khua Jơnum min djop djuai ania mơnuih mơnam Việt Nam brơi thâo:

Mơng hơdôm hrơi pơphun bruă kơđi čar yôm phăn mơng Ping gah hăng Kơnuk kơna laih dong bruă pơgang klin Covid-19 ƀơi dêh čar ta brơi ƀuh ƀing mơnuih apăn bruă, mơnuih mă bruă amăng Jơnum min djop djuai ania mơnuih mơnam truh pơ ƀon lan, djop anom bruă lêng kơ ngă tui djơ̆ tơlơi pơtô mơng Khua mir sir Hồ Chí Minh: Amuñ aka hơƀơ̆i ƀu hơmâo tơlơi gum pơgôp mơng mơnuih ƀon sang ăt ƀu dưi, tơnap aka hơƀơ̆i tơdah hơmâo mơnuih ƀon sang djru amra pơgiong mơtăm”.

Jơnum lăng nao rai mơng ataih đơ đam dêh čar kiăng lăng glăi bruă pơphun plĕ hră ruah Khua pơ ala mơnuih ƀon sang dêh čar tal XV hăng Khua jơnum min pơ ala mơnuih ƀon sang djop gưl rơwang thun 2021-2026.

Đĭ pơhiăp pơđut mông jơnum, Khua git gai pơ ala mơnuih ƀon sang dêh čar ơi Vương Đình Huệ brơi thâo, jơnum hơmâo pơsit tong, tui tơlơi git gai lăp djơ̆ mơng Ding jum kơđi čar, Khul apăn bruă Ping gah, tơlơi git gai ngă tui khut khăt, thâo pơčeh phrâo, mơng Ƀirô Khua pơ ala mơnuih ƀon sang dêh čar, Jơnum min djop djuai ania mơnuih mơnam Việt Nam, djop gưl, djop gơnong bruă, djop khul grup bơdjơ̆ nao mơng gơnong glông truh ƀon lan, tal plĕ hră ruah Khua mua pơ ala mơnuih ƀon sang dêh čar hăng Khua jơnum pơ ala mơnuih ƀon sang djop gưl rơwang thun 2021-2026 hơmâo pơphun hiam klă amăng djop mơta, pơhlôm ngă pô, bơkơnar, djơ̆ tơlơi phiăn, rơnuk rơnua, thâo pơkrem hăng anai lĕ hrơi jơnum tum pơƀut abih bang mơnuih ƀon sang.

Jơnum ăt ba glăi 5 mơta tơlơi găn rơgao yôm phăn, anun lĕ: ngă tui pran gum pơgôp mơng abih bang mơnuih, pran mut hrŏm mơng djop djuai ania hăng djop tơring đăo, tơlơi đăo gơnang mơng mơnuih ƀon sang, tơlơi gơgrong mơng mơnuih ƀon sang, tơlơi gum hrŏm mơng djop anom bruă amăng tal plĕ hră lĕ tơlơi yôm phăn, pơhlôm tal plĕ hră dưi pơphun hiam klă: Khua git gai pơ ala mơnuih ƀon sang dêh čar ơi Vương Đình Huệ, Khua Khul pơphun plĕ hră lăi pơtong:

Pơhlôm ngă tui klă hơdră ruah mơnuih apăn bruă; mơng bruă pơčrông sai tơbiă ană, mă tơlơi pơgôp hiăp mơng mơnuih ƀon sang, pơsur mơnuih ƀon sang nao plĕ hră kiăng kơ ruah đĭ ƀing khua mua thâo rơgơi, djơ̆ hăng tơlơi kiăng, tơlơi pơkă. Ruah ƀing ding kơna amăng hơdôm grup djru pơphun plĕ hră ƀơi ƀon lan brơi thâo bruă, abih pran jua, thâo tơlơi phiăn plĕ hră, thâo djop mơta bruă bơdjơ̆ nao, tơlơi pơkă amăng bruă plĕ hră, jŭ yap hră plĕ; ngă klă hơdôm bruă pơtô hrăm bruă pơphun plĕ hră brơi hơdôm khul grup djru pơphun plĕ hră, biă mă ñu lĕ Grup pơphun plĕ hră.

Khua git gai pơ ala mơnuih ƀon sang dêh čar ơi Vương Đình Huệ, Khua khul git gai pơphun plĕ hră đĭ pơhiăp pơđut mông jơnum

Khua git gai pơ ala mơnuih ƀon sang dêh čar ơi Vương Đình Huệ, Khua khul git git pơphun plĕ hră lăi pơtong, ƀing ta hok mơ-ak hăng hơdôm boh than dưi ngă amăng tal plĕ hră laih rơgao. Sit biă ñu, amăng hrơi blan tơnap tap yua bơbeč mơng klin, bruă pơphun hiam klă tal plĕ hră anai brơi ƀuh pran khăp kơ lŏn ia, thâo gum pơgôp, gơgrong mă pô găn rơgao tơnap tap hăng hrưn đĭ mơng djop djuai ania Việt Nam, ba glăi tơlơi đăo gơnang prong prin mơng mơnuih ƀon sang hăng Ping gah laih dong Kơnuk kơna ta.

Tui hăng Khua git gai pơ ala mơnuih ƀon sang dêh čar ơi Vương Đình Huệ, pơ anăp anai, bruă kiăng ngă hăng Khua mua pơ ala mơnuih ƀon sang dêh čar tal XV hăng Khua jơnum min pơ ala mơnuih ƀon sang djop gưl lĕ prong biă mă, kiăng tañ pơphun mơtăm yơh. Sit biă ñu lĕ kiăng đing nao amăng bruă pơphun jơnum tal blung a Khua mua pơ ala mơnuih ƀon sang dêh čar tal tal XV. Anai lĕ jơnum yôm phăn hăng lu bruă akŏ phun kiăng sem lăng, pơsit bruă mă hăng ruah khua mua pơprong amăng Kơnuk kơna amăng rơwang mă bruă anai; sem lăng, pơsit sa, dua jơlan hơdră, akŏ bruă prong amăng dêh čar ta amăng 5 thun pơ anăp anun lĕ: Akŏ bruă pơđĭ kyar bơwih ƀong huă - mơnuih mơnam, akŏ bruă prăk kak, tuh pơ alin thun blan gap ƀrô hăng sa, dua jơlan hơdră tui hơnong pơkă dêh čar amăng rơwang thun 2021-2025.

Siu Đoan: Pơblang