VOV4.Jarai-Ƀơi anăp tơlơi pơhing klin Covid 19 ƀă hyu kơtang biă mă ƀơi ƀôn prong Hồ Chí Minh hăng hơdôm tơring čar gah kual Dơnung, hơdôm rơbâo čô mơnuih glăi pơ plơi pla đĭ rơdêh thut rôk tui jơlan prang mrô 14. Hơmâo mơnuih glăi pơ kual Dap Kơdư samơ̆ hơmâo mơ̆n đơ đam glăi pơ hơdôm tơring čar kual Tong krah ataih biă mă.

Găn rơgao hơdôm rơtuh km đĭ rơdêh thut, tăp năng truh rơbâo km, pơgiăng gơnam pơkă pơrơkưng gah klôn, wơ̆t ană bơnai, čơđai anet brŭng brăng, ƀu kơdŭn kơ hrơi hăng mlam hơjan hăng angin, gơñu kơnong čang rơmang glăi truh pơ plơi pla rơnuk rơnua đôč.

Amăng krah jơlan glăi anun, lu mơnuih nao mă bruă apah dưi hơmâo lu anom bruă kơnuk kơna djru mơnong ƀong huă, ia săng rơdêh gơnu đĭ, djru pơgang ba tơlơi suaih pral, laih dơ̆ng pơkă lăng kman pioh ba nao dŏ pơ anih pơčlah hlơi pơdjơ̆ nao hăng ƀing ƀă kman Covid 19.

Anih pơgăn ƀơi Cai Chanh, gah tơring glông Dak Rlâp, tơring čar Dak Nông lĕ amăng jang mut nao rai blung a ƀơi jơlan prang 14 hăng hơdôm tơring čar kual Dap Kơdư, anun yơh anih anai mă bruă tơnap biă mă, yua dah mrô mơnuih glăi jai hrơi lu, jơngum biă mă. Kiăng huăi kơđông kơniă jơlan rô, laih dơ̆ng pel ĕp tong ten tơlơi suaih pral kiăng thâo, ba pơčlah mơtam hlơi đăo đing ƀă kman. Ơi Phan Nhật Thanh, Khua Jơnum min mơnuih ƀôn sang tơring glông Dak Rlâp brơi thâo:

“Ƀơi anih pơgăn jơlan pel ĕp či Cai Chanh tơring glông Dak Rlâp, gơmơi kơtưn brơi lu tơhan mă bruă, pơtô lăi, pel ĕp hăng pơhaih bruă ia jrao. Amăng mông mă bruă mah mơnuih lu hai samơ̆ mơnuih ƀôn sang ăt ngă tui djơ̆ tơlơi pơtrun, dŏ ataih djơ̆ hnong pơkă. Laih anun ƀing mơnuih mă bruă kơnuk kơna dŏ ngă bruă ƀơi anih pơgăn Cai Chanh ăt bơblih nao rai mă bruă hrơi hăng mlam 3 wơ̆t bơblih.

Hơdôm anih kơđông jơlan gơmơi brơi nao tơhan plơi djru ba, ƀing nai ia jrao să hăng ƀing khua mua apăn bruă čar dŏ pơ să jĕ giăm anun djru ba”.

Anih pel ĕp ƀơi  tơdrung tua Ia Hleo djru asơi añăm kơ mơnuih ƀôn sang

Tui hăng rơnoh jŭ yap mơ̆ng anom bruă tơring čar Dak Nông mơ̆ng hrơi hơdôm tơring čar pơ dơnung ngă tui bruă pơčlah mơnuih mơnam rĭm hrơi hơmâo boh ƀiă ñu 5000 čô mơnuih đĭ rơdêh thut glăi pơ hơdôm tơring čar kual Dap Kơdư. Ƀơi Dak Nông hơdôm hrơi giăm anai mơnuih ƀôn sang mơ̆ng tơring čar pơkŏn glăi ăt đĭ truh 1000 čô mơnuih.

Tlam mơmŏt lơ 29/7 phrâo rơgao, hơmâo năng ai 900 čô mơnuih mă bruă pơ Đồng Nai glăi pơ Dak Lak hăng rơdêh thŭt. Mrô mơnuih anai hơmâo čih anăn rơkâo hăng anom bruă kơnuk kơna tơring čar Đồng Nai laih, laih anun dưi glăi sit hơmâo hră test lăng ĕp kman hmar huăi djơ̆ kman Covid 19 ôh dưi glăi, huăi dŏ glăi ĕp dơ̆ng tah ƀơi anih pơgăn jơlan. Mơnuih mă bruă čar mơ̆ng tơring čar Đồng Nai akŏ pơjing grup tơhan pơlih ba jơlan hlâo, čung ba truh 400 km, laih dơ̆ng brơi rơdêh hơmâo kơthung dưm gơnam pơrơ-ot pioh pơgiăng mơnong ƀong huă djru kơ khul mơnuih rŭi glăi ƀơi krah jơlan.

Jơlan rŭi đĭ rơdêh hrơi mlam ƀu pơdơi ôh krah adai hơjan, lơ̆m truh pơ Dak Lak, hơmâo anom bruă kơnuk kơna tŭ jum phung mơnuih anai laih anun ba nao pơ sang hră đôm lăm kơnuk kơna čem rông čơđai sang hră mơnuih djuai ania ƀiă N’Trang Lơng, plơi prong Ƀuôn Ma Thuôt pioh ngă hră pơar, ĕp glăi kman sa wơ̆t dơ̆ng tơdah kiăng.

Pơtô brơi mơnuih ƀôn sang mut nao pơ anih pel ĕp klin Covid 19 či Sao Mai

Rơwang hrơi tơjuh rơgao, ƀơi jơlan prang 14, hơmâo na nao khul mơnuih mơ̆ng ƀôn prong Hồ Chí Minh hăng hơdôm tơring čar gah kual Dơnung glăi pơ plơi pla. Hơmâo mơnuih glăi pơ kual Dap Kơdư, hơmâo đơ đa glăi truh pơ hơdôm tơring čar phiăr pơ kual Tong krah adih ataih biă mă. Laih găn nao pơ Dak Nông, Dak Lak, gơñu truh pơ anih pơgăn jơlan či tơdrông tua Ia Hleo, tơring glông Čư̆ Pưh, Gia Lai. Pơ anai, ơi Hồ Văn Thanh glăk hrom hăng gơyut ñu đĭ rơdêh thut mơ̆ng ƀôn prong Hồ Chí Minh glăi pơ Kon Tum brơi thâo:

“Kâo mơ̆ng tơring čar pơkŏn glăi, khua mua pơ anai mă bruă hmar biă mă, ngă gêh găl brơi gơmơi, djru tuh brơi ia săng, brơi ia mơñum, mì tôm, ƀañ tơpung pioh ƀong krah jơlan glăi. Kâo bơni biă mă pran jua mơ̆ng khua mua ƀơi tơring čar Gia Lai”.

Tui hăng Trung tá Nguyễn Minh Tuấn, Khua grup Tơhan pơlih jơlan glông mrô 1, kông an tơring čar Gia Lai, amăng hơdôm hrơi rơgao, hơmâo lu biă mă mơnuih hăng khul rơdêh glăi mơ̆ng kual hơmâo klin. Giong pơhaih bruă ia jrao, mơnuih ƀôn sang dŏ tơguan ƀơi anih pơdơi jăng jai, arăng ƀơk brơi mơnong ƀong, ia mơñum huăi apah prăk ôh. Giong anun kah tơhan kơnuk kơna pơtô brơi jơlan či rŭi nao dơ̆ng glăi pơ plơi pla gơñu gêh găl hloh.

"Ră anai, kah hăng hơdôm hrơi giăm anai lu mơnuih hloh, mơnuih ƀôn sang mơ̆ng kual hơmâo klin glăi lĕ gơmơi khom ba nao dŏ pơ anih pơčlah mơ̆ng 500-600 čô. Hơdôm mơnuih pơ tơring čar pơkŏn hă, găn nao pơ Gia Lai ăt hơmâo truh 600 čô mơ̆n”.

Jơlan glăi pơ sang anŏ rôk tui jơlan prang 14, lơ̆m găn rơgao abih hơdôm tơring čar, ƀing hyu mă bruă apah ăt bưp lu anih pơgăn jơlan mơ̆n laih anun nao truh pơ anih pơggăn či Sao Mai-amăng jang či mut nao mơ̆ng gah dơnung tơring čar Kon Tum. Mah ƀu tơnap kah hăng pơ anih phun bưp ƀơi anih pơgăn či Cai Chanh tơring čar Dak Nông ôh, samơ̆ rĭm hrơi ăt hơmâo mơ̆ng 250 truh 350 čô mơnuih găn nao pơ anih pơgăn jơlan anai.

Tơhan kơnuk kơna tơring čar Kon Tum čung mơnuih ƀôn sang găn nao ƀơi tơring čar

Pơ anai, ƀing tơhan kơnuk kơna dŏ mă bruă hrơi hăng mlam ƀu pơdơi ôh, čơkă mơnuih mơ̆ng kual hơmâo klin. Giong pơtô brơi anih pơdơi pơdă kiăng hơmâo glăi pran, mơnuih ƀôn sang tŭ mă tơlơi djru kah hăng ia mơñum, asơi añăm, điơ̆ ñar, ƀañ tơpung hăng hling brơi ia săng bă đing săng rơdêh gơñu ƀu apah prăk ôh, brơi gơñu nao dơ̆ng pơ anăp adih. Ayong Lê Hương, sang ñu pơ tơring glông Phú Vang, tơring čar Thừa Thiên Huế brơi thâo:

“Kâo rai mơ̆ng Phú Giáo, tơring čar Bình Dương či glăi pơ plơi pla. Truh pơ Bình Phước giong, glăi truh pơ Dak Nông. Dak Nông giong glăi truh pơ Gia Lai. Gia Lai djru ia săng, mơnong ƀong huă hăng ia mơñum pioh glăi dơ̆ng. Tơhan pơlih jơlan glông tơring čar Kon Tum pơ anai gơñu ăt djru brơi ia săng, mơnong ƀong huă hăng ia mơñum”.

Ƀơi anăp kơ tơlơi tơnap tap hăng gleh glar mơ̆ng mơnuih hyu mă bruă apah, mơnuih ngă bruă ƀu hơđong lĕ ƀơi krah jơlan mơ̆ng kual hơmâo klin Covid 19 pơ Dơnung glăi pơ plơi pla, hrom hăng khua mua gong gai kơnuk kơna djop tơring čar kual Dap Kơdư, lu khul grup mơnuih tơpuôl, anom bruă, ană plơi pla hai ƀơi djop tơring glông kơtuai jơlan sit ƀuh hlơi hơmâo tơlơi kiăng djru lĕ lêng kơ djru ba soh hơdôm rơtuh anung gơnam ƀong, ia mơñum brơi đôč đač kiăng kơ ƀing gơñu glăi dưi truh pơ plơi pla ataih tin laih anun pioh kơ ƀing hyu mă bruă apah anun amuñ glăi truh pơ sang anŏ hăng tơlơi rơnuk rơnua.

Nay Jek: Pơblang