VOV4.Jarai - Mơguah anai (8/10), ƀơi Hà Nội, Ding jum ngă hmua hăng pơđĭ kyar ƀon lan pơphun jơnum lăng nao rai mơng ataih đơ đam dêh čar kơ bruă “pơđĭ kyar bruă rông hlô mơnong hơdôm blan rơnuč thun 2021 hăng pok pơhai akŏ bruă thun 2022”. Bưp lu tơnap tap, tơlơi lông anun lĕ: klin Covid-19 ƀă ƀơi ană mơnuih hăng klin kheng amăng hlô mơnong ngă tơnap tap; bruă sĭ mơdrô gơnam tam ăt tơnap mơn lơ̆m gơnam ƀong kơ hlô mơnong đĭ nua samơ̆ nua bơwih ƀong amăng bruă rông hlô rông him lăng đĭ 4,2% pơhmu  tui tơđar thun hlâo. Tui anun, 9 blan laih rơgao, abih bang mơnong ba sĭ mơdrô rơbêh 4 klăk 700 rơbâo tơ̆n; rơbêh 12 klai boh mơnŭ hăng giăm 900 rơbâo tơ̆n ia tơsâo rơmô … Tui tơlơi pơsit hrŏm, amăng bruă rông hlô mơnong hơdôm blan rơnuč thun tŏ tui bưp tơnap tap kiăng pơsir hĭm sit biă ñu bruă ba hyu sĭ mơdrô hăng blơi gơnam ƀong brơi hlô rông kiăng kơ tŏ tui rông glăi lu dong, laih dong pơhlôm djơ̆ hăng tơlơi kiăng amăng rơnuč thun, biă mă ñu amăng bơyan čơkă thun phrâo laih dong ba sĭ mơdrô pơ tač rơngiao.

Siu Đoan: Pơblang