VOV4.Jarai - Čơtlăm lơ 8/7, Ding jum wai lăng bruă jơlan glông, dŭ pơgiăng dêh čar ta hmâo hră pơ-ar ječ mơ-ĭt kơ Jơnum min mơnuih ƀôn sang tơring čar Lâm Đồng, Anom wai lăng bruă rơdêh por rơdêh por Việt Nam hăng Anom ia jrao gah jơlan nao rai dŭ pơgiăng kơ bruă pơdơi jăng jai hơdôm tal por nao rai mơng ƀôn prong Hồ Chí Minh nao pơ̆ tơring čar Lâm Đồng. Ƀơi anăp klin Covid-19 ngă glêh tơnap, hơdôm mơnuih ƀă kơman Sars-CoV-2 ƀơi Lâm Đồng leng kơ hmâo phun akha tưp mơng hơdôm mơnuih nao rai ƀôn prong Hồ Chí Minh, Jơnum min mơnuih ƀôn sang tơring čar Lâm Đồng hmâo črâo ba laih hơdôm bôh ƀirô apăn bruă ngă tui tơlơi pơdơi jăng jai hơdôm tal por nao rai mơng ƀôn prong Hồ Chí Minh nao pơ̆ Lâm Đồng hăng pơwot glăi. Lom anun, jơlan por nao rai kơplah wah dua anih anom anai ăt dô̆ mơn hăng rơnoh por 5 wot amăng sa rơwang hrơi tơjuh, ngă bơdjơ̆ nao hăng ngă tơnap kơ bruă wai lăng, pơgang, pơgăn klin Covid-19. Yua anun, Ding jum wai lăng bruă jơlan glông, dŭ pơgiăng dêh čar ta hmâo tŭ ư laih hơdră pơtrun kơ bruă pơdơi jăng jai hơdôm tal por pơgiăng tuai mơng ƀôn prong Hồ Chí Minh nao rai pơ̆ Lâm Đồng tui tơlơi ba tơbiă mơng Jơnum min mơnuih ƀôn sang tơring čar Lâm Đồng. Hrơi blan mă yua lĕ yap mơng 12 mông krah mlăm lơ 9/7./.

Siu H’ Prăk: Pô pơblang