VOV4.Jarai - Hơdôm thun laih rơgao, Ping gah, gong gai, Jơnum min djop djuai ania mơnuih mơnam hăng djop khul grup kơđi čar - mơnuih mơnam ƀơi djop ƀon lan lêng kơ đing nao ngă tui hơdôm hơdră djru brơi kual mơnuih djuai ania ƀiă, sit biă ñu amăng tuh pơ alin man pơkra anih anom, jơlan glông, djru brơi bơwih ƀong huă hăng gru grua.

Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng kual ataih, asuek rơwang thun 2021-2030 hơmâo Khua pơ ala mơnuih ƀon sang dêh čar tŭ yap, anai lĕ tơlơi yôm phiăn amăng pơđĭ kyar bơwih ƀong huă-mơnuih mơnam amăng dêh čar ta. Tui anun, boh tơhnal mơng jơlan hơdră hơmâo 10 akŏ bruă mă, amăng anun hơmâo akŏ bruă 6 kiăng pơtong kơ bruă “Djă pioh, lăi pơthâo gru grua hiam klă mơng mơnuih djuai ania ƀiă pơlir hăng bruă bơwih brơi tuai čuă ngui”. Lăi pơthâo kơ hơnong pơkă mơng jơlan hơdră, Jơnum min djuai ania ăt ba tơbiă hơdôm bruă mă kiăng kơ djă pioh, lăi pơthâo gru grua yôm phara mơng djop djuai ania ƀiă hrŏm hăng bruă lui hĭ tơlơi phiăn sô hơđăp ƀu hiam. Sit biă ñu hơmâo wŏt bruă pok anih pơtô hrăm mă ngă, pơtô glăi hơdôm gru grua hiam gah bơngăt; djru brơi hơdôm akŏ bruă ĕp pơƀut glăi, hơkrŭ glăi, djă pioh, lăi pơthâo gru grua hiam gah bơngăt mơng mơnuih djuai ania ƀiă hŭi kơ rơngiă hĭ pơgi kơdih anai; pơjing hơdôm grup djă pioh gru grua sô hơđăp amăng djop plơi pla ala ƀon mơnuih djuai ania ƀiă; djru tuh pơ alin pơjing hơdôm anih djă pioh gru grua pơlir hăng bơwih brơi tuai čuă ngui amăng plơi pla mơnuih djuai ania ƀiă ….Truh ră anai, lu plơi pla hơmâo mă bruă lăp djơ̆ hơdôm hơdră pơtô pơblang, djru brơi neh met wa mơnuih djuai ania ƀiă lui hĭ hơdôm tơlơi phiăn sô hơđăp ƀu hiam amăng mơyut jôk, pơdô̆ rơkơi bơnai, ngă then, rơkâo bưng hiam…anai lĕ hơdôm tơlơi phiăn ƀu hiam, ngă khưi khai kông ngăn, rơngiă hrơi mông. Yă Pờ Diệu Linh, Kơ-iăng khua jơnum min mơnuih ƀon sang tơring glông Mường Nhé - tơring čar Điện Biên brơi thâo:

“Tơring glông ăt pơtrun lu hơdră bruă đing nao djru brơi mơnuih djuai ania ƀiă, djru amăng pơđĭ kyar bơwih ƀong huă, djru brơi pơjeh phun pla, hlô rông, sit biă ñu amăng bruă djă pioh gru grua mơnuih djuai ania ƀiă, bruă ĕp djă pioh glăi hơdôm tơlơi adôh ayun suang kah hăng hơdôm hrơi ngă yang rơbang tui gru grua hơđăp, mơñam eng ao, pơdong sang dŏ, ăt hơmâo đing nao, abih bang hơdră djru anun mơnuih djuai ania ƀiă thâo rơđah, hăng abih pran djă pioh gru grua yôm phara mơng djuai ania pô”.

Pơ anăp anai, kiăng kơ ƀơƀrư̆ pơgiong anih anom, jơlan glông ƀơi kual mơnuih djuai ania ƀiă hăng kual ataih, asuek, pơlir hăng bruă pơđĭ kyar bơwih ƀong huă-mơnuih mơnam, laih dong ngă hrưn đĭ tơlơi hơdip mơda kơ neh met wa; đing nao bruă djă pioh, lăi pơthâo gru grua mơnuih djuai ania ƀiă, đing nao pơjing tơlơi hơdip phrâo, tŏ ngă tui hơdôm gru grua hiam klă, lui hĭ tơlơi phiăn sô hơđăp ƀu hiam, pơjing tơlơi hơdip hiam, hơkrŭ glăi hơdôm hrơi mông ngă yang rơbang tui tơlơi rơkâo mơng mơnuih djuai ania ƀiă.

Amăng bruă djă pioh, lăi pơthâo gru grua yôm phara mơng mơnuih djuai ania ƀiă, djop anom bruă bơdjơ̆ nao kiăng đing nao kơsem min, čih pơkra tơlơi pơkă amăng tơlơi phiăn; kơtưn kơsem min djop mơta, abih bang, lăng glăi tong ten bruă djă pioh gru grua mơng mơnuih djuai ania ƀiă hăng mơnuih kual ataih, asuek. Kơ-iăng nai tha prin-nai prin tha Trần Văn Bình, Khua anom pơtô bruă wai lăng gru grua mơnuih djuai ania ƀiă ƀơi Việt Nam - Sang hră gưl prong gru grua brơi thâo:

“Djă pioh gru grua sô hơđăp ƀu djơ̆ djă pioh wŏt hơdôm gru grua sô hơđăp ƀu hiam mơng đưm hlâo, mơ djă pioh hơdôm anŏ yôm, hơdôm anom bruă kơsem min hăng anom bruă wai lăng ƀơi ƀon lan thâo rơđah hơdôm anŏ yôm, mơng anun djă pioh brơi djuai ania anun, pơjing tơlơi hơdip tui gru grua hiam, pơ-ư ang mơng mơnuih djuai ania ƀiă hăng ƀing gơñu amra hluai tui anun kiăng kơ djă pioh na nao”.

Sit biă ñu, lơ̆m ngă tui hơdră djuai ania, djă pioh gru grua yôm phara mơng đưm hlâo lĕ kiăng pơgôp hrŏm amăng pơđĭ kyar bơwih ƀong huă-mơnuih mơnam amăng kual anun lăi phara hăng đơ đam dêh čar hnun mơn. Hrŏm hăng anun lĕ pơsir hĭ hơdôm anŏ aka ƀu klă amăng anih anom, jơlan glông, kar hăng bruă kơƀah sangdŏ, lŏn dŏ, lŏn ngă hmua, ia hơdjă; kah pha hăng pơdong plơi pla hơđong ƀơi hơdôm kual tơnap tap, biă mă ñu lĕ kual amuñ hơmâo tơlơi truh sat mơng ayuh hyiăng; pơđĭ kyar ngă hmua, pla kyâo glai, pơhlôm brơi tơlơi hơdip hơđong, hơmâo lu dong mơnuih thâo rơgơi mă bruă, bơwih brơi tơlơi suaih pral kơ mơnuih ƀon sang….

Siu Đoan: Pơblang

Thu Hoà - VOV4