VOV4.Jarai - Tơdơi kơ 2 hrơi pơphun, tlam lơ 26/11, ƀơi Hà Nội, jơnum hlăk ai rơgơi kơhnâo Việt Nam tar ƀar rŏng lŏn tơnah tal 4 pơđut laih. Amăng mông jơnum, ƀing hlăk ai hơmâo pơčrông sai, ba tơbiă hơdôm tơlơi rơkâo kơ hơdră bruă kiăng kơ tŏ ngă tui tơlơi thâo thăi mơng hlăk ai Việt Nam gơgrong, gir run, gum pơgôp amăng bruă pơčeh phrâo djru brơi lŏn ia ta, pơjing anih pơlăi nao rao kiăng Kơnuk kơna hăng hơdôm anom bruă bơdjơ̆ nao tŭ mă hơdôm anŏ pơčeh phrâo mơng hlăk ai kơ hơdôm bruă kiăng hloh amăng pơđĭ kyar lŏn ia ta. Amăng jơnum hlăk ai rơgơi kơhnâo Việt Nam tar ƀar rŏng lŏn tơnah tal anai hơmâo hơdôm pluh tơlơi rơkâo kiăng pơđĭ kyar mơnuih mă bruă thâo rơgơi amăng mă yua boh thâo măi mok hăng wai lăng bruă bơwih ƀong huă mă yua boh thâo phrâo hăng 2 akŏ bruă čih anăn kiăng pơgôp ngă tui tŭ yua hloh tui jơlan hơdră pơplih mă yua boh thâo phrâo mơng Kơnuk kơna. Hơdôm tơlơi pơgôp hiăp mơng ƀing hlăk ai amra pơƀut glăi hăng ba nao pơčrông lô laih anun rơkâo đĭ Ping gah, Kơnuk kơna hơdôm bruă lăp djơ̆ hăng hơnong pơkă pơđĭ kyar hơđong kjăp lŏn ia ta.

Siu Đoan: Pơblang