VOV4.Jarai-Tơdơi kơ 4 hrơi mă bruă hmar, ječ ameč, tơpă hnong, gơgrong ba kjăp, tlam lơ 8/7, Jơnum lok 3 khua mua apăn bruă ping gah dêh čar tal 13 pơđut laih, ngă giong tơhnal pơtrun, pơđut tañ hloh pơkă hăng hlâo kơ anun sa hrơi. Khua git gai ping gah ơi Nguyễn Phú Trọng git gai jơnum hăng pơhiăp klah čun pơđut jơnum.

Khua git gai ping gah ơi Nguyễn Phú Trọng git gai jơnum hăng

pơhiăp klah čun pơđut jơnum

Hăng pran jua mă bruă lăng tơpă, sem tong ten hơdôm yôm djơ̆ rơ-ua, Jơnum anai tŭ ư pơtong glăi bruă ngă tui akŏ bruă pơđĭ kyar bơwih ƀong huă mơnuih mơnam, prăk kăk dêh čar, tuh pơ alin 5 thun mơ̆ng thun 2015-2020, laih anun tơlơi pơhing bơwih ƀong huă mơnuih mơnam 6 blan akŏ thun 2021.

Laih dơ̆ng, pơgôp hiăp git gai ngă giong akŏ bruă pơđĭ kyar bơwih ƀong huă mơnuih mơnam, prăk kăk dêh čar, tuh pơ alin 5 thun pơ anăp dơ̆ng 2021-2025 pioh pơdah thâo khua mua pơ ala mơnuih ƀôn sang dêh čar tal XV sem glăi, pơsit amăng mông jơnum lok sa him lăng pơphun amăng rơnuč blan 7 anai.

Khua git gai ping gah ơi Nguyễn Phú Trọng brơi thâo, ƀơi mông jơnum gơnong dlông lok 3, khua mua apăn bruă ping gah hơmâo ruah 2 čô ding kơna Jơnum ĕp bruă mă ping gah gơnong dlông, laih anun pơsit jăm ƀuah ơi Trần Văn Nam-ding kơna apăn bruă ping gah dêh čar, Khua git gai ping gah tơring čar Bình Dương, brơi pơdơi abih bruă amăng ping gah; jăm ƀuah tơlơi soh ơi Vũ Huy Hoàng, khua hơđăp apăn bruă ping gah dêh čar, brơi tơbiă đuăi mơ̆ng ping gah.

Nay Jek: Pơblang