VOV4.Jarai-Tlam lơ 28/10, Khua dêh čar ơi Phạm Minh Chính hrom hăng ƀing khua mua amăng kual ASEAN, jơnum hrom pơđut tal jơnum khua mua pơprong kual ASEAN tal 38 hăng 39 hăng hơdôm tơlơi jơnum pơdjơ̆ nao pơkŏn laih anun ngă lơphet jao ngă khua ASEAN thun 2022 kơ dêh čar Kur. Pơhiăp ƀơi mông jơnum, hăng tơlơi ngă khua ASEAN thun 2021, dêh čar Brunei lăi, mah dŏ lu tơlơi tơnap lông lăng yua klin kheng Covid 19 ngă, ASEAN ăt pơđĭ kyar kjăp.

Anăp nao pơ dĭ da gla kơñ, dêh čar Brunei rơkâo pơtrut ngă hrom akŏ pơdong kual ASEAN pơtrut đĭ ngă hrom atur lu bơnah hăng akŏ pơdong bruă ngă hrom kơtang amăng kual. Tŭ mă bruă ngă khua ASEAN thun 2022, Khua dêh čar Kur pôr pơthâo akŏ bruă ngă khua ASEAN thun 2022 lĕ ASEAN ngă bruă hrom bong glăi tơlơi lông lăng yua tơlơi kiăng mut hrom, rơnuk rơnua hăng pơdrong asah, pơtrut bruă akŏ pơdong sa khul ngă hrom bơkơnar, kjăp hơđong hlom bom, djơ̆ hăng tơlơi mă bruă aliăng phun mơ̆ng ASEAN hrom hăng bruă pơtrut nao pơ anăp adih, djă pioh gru grua phara, sa khul ngă hrom sit nik.

Nay Jek: Pơblang